Tau, tulo ka tawo gi-ambush

Usa ka giingong sakop sa Tau Gamma Phi ug laing tulo pa ka tawo ang gibanhigan sa wala pa mailhing mga lalaki sa managlahing dapit dinhi sa dakbayan sa milabayng gabii ug kagahapon sa kaadlawon.

Giila ang naangol nga sakop sa Tau Gamma Phi mao si Jovencio Vidal, 26, kinsa padulong unta sa iyang kabanay aron pahibaw-on kabahin sa kamatayon sa ilang paryente dihang kalit nga gibanhigan diha sa Sitio Paglaum, Mambaling.

Ang biktima naigo sa iyang walang tiil ug wala mailhi kung si kinsa ang mibanhig kaniya, samtang usa ka Reneboy Sanchez, 20 nga usa ka basurero ang gibanhigan usab sa mga lalaking luwan og kolor puting multicab kagahapon sa kaadlawon diha sa dalan Manalili ning dakbayan.

Ang biktima padulong unta mobaligya sa iyang pinunitang scraps dihang nahitabo ang pagpamusil.

Laing biktima sa pagpamanhig mao sila si Norbe Jorge,24 ug Manuel Pabalan, 24 diha sa Sitio Sario Barangay Bulacao ning dakbayan.

Ang duha mamalit unta og ilimnong makahubog dihang gibanhigan sa tulo ka wala mailhing lalaki pag-abot sa ngitngit nga bahin sa ilang lugar.

Si Jorge naagtang, tiyan ug tuong kilid samtang si Pabalan naigo diha sa walang sampot ug pareho karong gitambalan sa Cebu City Medical Center.