Ang biktima kinsa usa ka helper sa Cebu Philippines International Language Services giilang si Norma Hugo, 45, residente sa nahisgutang lugar gidul-itan og pusil diha sa tampihak sa ulo sa duha ka wala mailhing mga lalaking luwan og motorsiklo.
Sumala pa sa imbestigasyon sa Homicide Section ang biktima uban sa duha ka mga higalang babaye kasamtangang nag-inom diha sa nahisgutang lugar dihang kalit nga gihunungan sa motorsiklo ug ang sakay niini maoy mikanaog ug mipusil sa ulo ug lawas sa biktima makadaghang higayon.
Sa kahadlok sa mga kainom niini daling nangikyas ang duha palayo, dangtan ang pila ka gutlo nangabot ang mga sakop sa Mobile Patrol Group ug mao nay midala sa biktima ngadto sa tambalanan.
Tulo ka basiyo sa kalibre 45 nga bala ug duha ka buhing bala susama niini ang nakuha sa grupo ni SPO3 Virgilio Bagasala diha sa crime scene.
Ang biktima maoy ika-125 nga biktima sa mga gituuhang vigilante nga nagsugod sa ilang operasyon sukad niadtong bulan sa Disyembre 22,2004 diin sagad sa gipamatay pulos dunay mga kriminal rekord ug ang uban mga nalambigit sa iligal nga drogas.
Si SPO3 Dennis Moga sa pakighinabi sa Banat News nagkanayon nga posibleng naalaan ang biktima gumikan sa "boy cut" nga tupi niini apan ang nakapatingala sa mga kabanay kay gikatahong human mahagba giusban pa kini og pusil.
"Wala may record(criminal record), nagpa-maid man gani ni siya diha sa mga Koreyano, nanawat sad og labada, naalaan lang gyud ni siya dili gyud siguro siya maoy target," asoy pang Moga.
Matud pa ni Moga nga dunay kabanay sa biktima nga dili buot magpaila ang mitug-an kaniya nga posibleng ang target babae usab nga susama og tupi sa biktima.
Ang biktima wala makaagwanta sa mga samad pinusilan sa iyang ulo ug nakabsan kini sa kinabuhi kagahapon sa kaadlawon human sa duha ka oras nga pakigsangka sa kamatayon. - Edwin Ian Melecio