Hinabang sa rehab gibalik sa CH

Hinay hinay nang gibalik sa kagamhanan sa siyudad sa Sugbo ang hinabang pinansiyal nga gihatag niini alang sa operasyon sa Cebu Center for the Ultimate Rehabilitation of Drug Dependents (CCURED).

Matud ni konsehal Augustus Pe Jr., tsirman sa committee on dangerous drugs sa konseho sa dakbayan sa Sugbo nga kapin sa P300 mil pesos ang ilaha karong giasikaso alang sa bayranan sa kuryente sa CCURED gikan niadtong bulan sa Abril hangtud sa Disyembre sa milabayng tuig.

Daling gipasabot sa konsehal nga gibalik sa siyudad ang paghatag og ayuda sa maong rehab center human gipakita sa bag-ong pamunoan niini nga bukas ug kanunayng mohatag sa husay sa tanang nagastos sa maong buhatan.

Matod ni Pe kaniadto walay kasayuran ang konseho sa mga nanghitabo sa CCURED gumikan kay walay ipasang husay kun breakdown sa mga nagastos hinungdan nga giputol sa siyudad ang tunga sa milyon nga ayuda niini sa maong buhatan matag tuig.

Nasayran nga gawas sa gahin gikan sa nasudnong kagamhanan alang sa maong CCURED magbayad pa gyud og P2, 500 ang matag pasyente nga anaa sa sulod sa maong rehab center matag bulan.

Nabulgar ang gituohang korapsyon sa maong buhatan atol sa nahitabong duha ka insidente sa pagpuga sa mga pasyente tungod sa mga reklamong "magpatahod," walay klarong pagkaon ug gimaltrato sila pag-ayo sa mga gwardiya nga daw giisip silang bilanggo imbes nga mga pasyente nga nagkinahanglang tabangan.

Nagkanayun si Pe nga dunay pundo alang sa panginahanglan sa maong institusyon kung gikinahanglan.