NPA nagtago sa bukid sa Aloguinsan?

Dako kaayo og purohan nga nagtagotago karon ang mga rebeldeng komunista sa bukiran sa Aloguinsan, matud pa ni Police Inspector Vicente Velasquez, hepe sa Aloguinsan Police Station.

Matud pa ni Velasquez nga daghang mga lugar sa bukid nga dili na nila masuot gumikan kay way karsada.

Ang kamingaw sa maong mga lugar nga way nagpuyo, maoy makapadani sa mga rebelde sa pagtago didto kay walay makadisturbo nila.

Ang ikaduhang hinungdan nganong malinawon ang mga rebelde sa pag-estar sa bukiran sa Aloguinsan mao ang kamalinawon niini hinungdan nga way mga otoridad nga magpunay og suroy didto.

Giangkon ni Velasquez nga kuwang gyud og karsada ang ilang kabukiran, apan bisan pa niini kutob sa mga dapit nga kasudlan og sakyanan tua gyud ang grupo sa mga polis nga nagbahasbahas sulod sa 24 oras sukad niadtong Biyernes.

Gani matud pa ni Velasquez nga human nila madawat ang taho kalabot sa giingong "sightings" kon nasigpatang mga pumpboat nga midunggo sakay ang armadong mga tawo didto sa baybayon sa Bonbon, mipatrolya dayon sila adlaw ug gabii.

Hinuon miingon si Velasquez nga mabinantayon kaayo sila ug dili sila molakaw nga mag-inusara sa kabalaka nga ambusan sila sa kontra.

Apan hangtod ning pagbalita wala silay nasigpatang mga rebelde sa bukid, ug wala usab silay nadawat nga mga report gikan sa mga opisyal sa kabarangayan ug ingon man sa Barangay Intelligence network BIN.