Armado naabot sa Tuburan

Gikonpirmar sa kapolisan sa lungsod sa Tuburan nga may midunggo nga duha ka pumpboat didto sa barangay Bagasawe, Tuburan, niadtong Lunes sa gabii nga gisakyan sa mga armadong tawo.

Matud pa ni PO1 Rasty Ong, dek officer sa Tuburan Police Station nga labing gipaalisto silang tanan karon sa pagbantay sa ilang buhatan.

Gumikan niini ang ilang estasyon karon gilibotan na sa mga guwardiyang polis nga mga sakop sa Regional Mobile Group (RMG).

Nagtuo ang kapolisan sa Tuburan nga ang midunggo nga armadong grupo niadtong Lunes, gikan sa Negros ug usa ka "augmentation force" sa New People's Army (NPA) alang sa ilang puwersa nga naa karon sa kabukiran sa mid-north.

Matud pa ni Ong nga karong nasuta nila nga mangatake na usab ang mga rebelde sa ilang lugar, labing gipahugtan nila ang pagbantay sa palibot sa lungsod.

Ang ilang gipangandaman mao kining mga semana human sa ika-37 nga anibersaryo sa NPA niadtong Marso 29, tungod kay nagtuo kini sila nga mo-relax na ang mokapolisan ug kompiyansa.

Midugang si Ong nga wala hinuon masuta ang gidaghanon sa mga armadong tawo nga gihatod sa duha ka pumpboat didto sa baybayon sa Bagasawe, apan gumikan sa kangitngit, nasuta lamang sa mga sakop sa Barangay Intelligence Network (BIN) sa maong barangay nga puno kaayo ang duha ka mga pumpboat.

May kalagmitan matud pa ni Ong nga gikatagkatag ang maong puwersa sa mga rebelde karon ngadto sa kabukiran sa Tuburan ug Tabuelan.

Ang Tabuelan maoy girumbo sa pangatake sa mga rebelde niadtong miaging semana diin usa ka sundawo sa gobyerno ug duha ka mga rebelde ang namatay.

Ang Tuburan ug Tabuelan may gilay-ong 15 kilometros apan didto sa kabukiran nanag-abot ra ang utlanan niini.