Shabu, marijuana ug upat ka pusher nasikop sa MCPO

Upat ka tawo ang nadakpan sa mga sakop sa vice squad section sa kapolisan sa dakbayan sa Mandaue ug nasakmit ang 82 ka stick ug usa ka tupper ware nga may pinaugang dahon sa marijuana uban sa duha ka dagkong pakete ug napulo ka medium nga pakete may sulod nga gidudahang shabu.

Ang ronda pinanguluhan ni PO2 Bruce Gairanod diin duha ka hugna ang operasyon diha sa Sitio Calderohan sa Maguikay ug Zone Ubi, Paknaan, siyudad sa Mandaue.

Nadakpang namaligya og marijuana mao sila si Ferdinand Tudtud, 27 anyos, minyo, Dennis Trocio, 35 anyos, ulitawo nga lumad nga taga Bato Toledo City ug temporaryong nagpuyo sa barangay Canduman.

Samtang sila si Victoriano Navarro, 48 anyos, minyo ug Erwin Pareja, 30, minyo nga pulos nagpuyo sa Zone Ubi sa barangay Paknaan mao usab ang nasakmitan og mga pinutos nga shabu.

Si PO3 Rammil Morpos, imbestigador sa vice squad section sa Mandaue City Police Office (MCPO) nga gikahinabi sa Banat News miingon nga nadakpan ang mga suspetsado sa akto nga nibaligya sa police decoy.

Matud pa ni PO3 Morpos nga gawas sa maong gidaghanon sa shabu ug marijuana nga nasakmit ang mga kahimanan sa paggamit ug salapi nga minarkahan nga maoy gigamit sa pagpalit ang lakip usab sa nasakmit.

Dugang pa niya nga nasakmit usab nila ang P600 nga gituohang halin sa drogas.