Hapon nga mga negosyante nalisang

Gibati nag hilabihang kalisang ang mga negosyanteng Hapon ning kagubot politikanhon sa Pilipinas hinungdan nga nagplano na kining mamalhin ngadto sa Thailand, India ug Vietnam.

Si Yasotumi Ota, executive director sa Japan External Trade Organization (Jetro) nagkanayon nga ang nakapakurog pag-ayo sa mga negosyanteng Hapon mao ang pagpatuman sa balaod nga State of National Emergency dili pa dugay.

Matud pa ni Ota nga dihang giproklamar ang maong balaod, gimandoan dayon sa mga negosyante ang ilang mga manager ug dakong opisyal nga Haponon sa pagpauli ngadto sa Japan.

Maoy hinungdan nga dihang gipahigayon sa Jetro ang usa ka "survey" niining bag-o, nasuta nila nga ang pulso sa mga negosyante nga taga Japan, adto na mamatigayon sa Thailand, Vietnam ug India.

Si Ota kauban sa mga dagkong opisyal sa Jetro miduaw dinhi sa nasud ug mibutyag sa tutulo ka mga butang nganong moatras na ang mga negosyante nila gikan sa Pilipinas.

Kini mao ang politikanhong kaguliyang, kamahal sa bayad ngadto sa mga mamumuo ug ang kataas sa buhisanan tungod niining Expanded Value Added Tax (EVAT).

Gawas niini, si Ota miingon usab nga ang Pilipinas kabos kaayo sa mga platapormang may labot sa infrastrAktura itandi sa Thailand.

Maoy hinungdan nga tua karon ang pontariya sa mga laraw sa mga negosyante sa Thailand ilabi na nga ning maong nasud, India ug Vietnam barato kaayo ang bayad sa mga trabahante.

May plano unta usab silang adto magnegosyo sa China, apan nabalaka usab sila nga sa umaabot nga panahon makabaton og krisis ang maong nasud sa ilang elektrisidad.

Kini gumikan sa kadaghan nang tawo sa maong nasud ug tua usab didto ang nagkalainlaing industriya, matud pa ni Ota.