Mga polis sa Pinamungajan motestigo pabor sa kauban

Andam ang kapolisan sa Pinamungahan pagtestigos pabor sa kauban nilang polis nga gikiha sa kasong pagpamun-og sa buhatan sa Cebu Provincial Police Office.

Ang gipasakaan og kiha mao si PO2 Dave Talaboc, sa Pinamungahan Police Station ug bata-bata usab ni Mayor Jeffrey Yapha sa maong lungsod.

Ang mikiha kang Talaboc mao si Teofania Villanueva, ang inahan sa usa ka 24 anyos nga ulitawo kinsa giingong gikulata ni Talaboc niadtong Marso 5, didto sa atubangan sa tigbakayan sa Pinamungahan.

Uban sa maong kiha ang medical certificate nga nagpakita nga nabulit sa mga samad ug bun-og ang kalawasan ni Erick Villanueva kay gibukbok ni Talaboc.

Apan sa bahin ni SPO3 Romeo Jaranilla, desk officer sa Pinamungahan Police Station, siya mihimakak sa pasangil batok kang Talaboc.

Matud pa ni Jaranilla nga diha siya sa pag-abot ni Villanueva nga gisikop ni Talaboc sa mga alas 7:30 sa gabii niadtong Marso 5 kinsa gibalhog dihadiha sa prisohan kay hubog kaayo.

Si Talaboc niadtong tungora mialegar nga iyang gisikop si Villanueva tungod kay nakigsambunot kini sa pipila ka mga estambay didto sa lungsod.

Gani dihang miabot si Teofania, ang inahan ni Erick, nagkahusay dayon kini og si Talaboc hinungdan nga nakagawas usab dayon ang dinakpan niadtong tungora.

Apan una mibiya sa buhatan sa kapolisan ang inahan ug anak, nagpinirmahay pa silag kasabotan nga dili na ipadako pa ang maong kaso.

Midugang si Jaranilla nga nakurat nalang siya dihang nasayran nga gipadangat sa biktima ang maong kaso ngadto sa buhatan ni Supt. Vicente Loot.

Hinuon si Talaboc sa pagkakaron nagpabiling nagserbisyo sa iyang katungdanan isip polis ug body guard sa mayor sa Pinamungahan.