Matud ni Provincial Comelec Supervisor Edwin Cadungog usa ka tuig na lang sa dili pa ang lokal nga eleksiyon ug maglisud na sila sa pag-kumpleto sa himuon unyang pag-verify sa mga pirma nga nahipos sa maong signature campaign nga iduso sa ilang buhatan.
Gitug-an ni Cadungog nga maglisud sila paghuman sulod sa duha ngadto sa tulo ka bulan sa himuong pag-verify sa maong mga pirma aron pagtino kon dili ba kini minao-mao gumikan kay ma-bisi na man usab kaayo sila unya sa pagpangandam nga himuon alang sa nagsingabot nga pinili-ay.
Samtang gipadayag sab ni City Election officer Simaco Labata nga maglisud usab ang ilang buhatan pagsugod unya sa verification process gumikan kay atua pa karun sa kaulohan ang tanang mga rekord sa mga botante dinhi sa dakbayan gumikan sa giduso nga election protest ni kanhi Senador John Osmeña.
Nasayran nga gitinguha sa grupo nga pabor sa charter change nga makumpleto na ang pagpanghipos og mga pirma sa pag-abot sa Mayo aron maduso dayon kini sa Comelec aron kasugdan sa labing daling panahon ang pag-verify sa mga pirma niini.
Kagahapong adlawa gi-konpirmar ni Cadungog nga nakadawat na sila og opisyal nga kamanduan gikan sa ulohang buhatan sa Comelec nga nagmando kanila pag-verify sa mga iduso nga pirma nga nahipos sa gipahigayong signature campaign.