Militante supak sa People's Initiative

Dakung supak ang mga militanteng pundok dinhi sa dakbayan sa Sugbo sa gipasiugdahan sa gobyerno nga People's Initiative nga gitumong aron gyud molampos ang pag-usab sa Batakang Balaod.

Gikwestyon sa grupong Freedom from Debt Coalition ang Department of Interior and Local Government DILG nga migamit karon sa pundo sa gobyerno alang sa signature Campaign.

Si Lito Vasquez ang Head sa grupong Freedom from Debt Coalition miingon nga illegal ang maong lakang gumikan kay kon duna may pag amendar nga pagahimuon sa Batakang Balaod gikinahanglan nga manukad sa katawhang Pilipinhon ug dili sa gobiyerno.

Una nang gikataho nga gipahimuslan sa DILG ang tinuig nga kal an sa Barangay Assembly lukop nasud niadtong Sabado alang sa signature campaign.

Gitumong ang maong lakang aron makakuha og dose porsiyento sa kinatibuk-an sa mga botante sa tibuok nasud alang sa pagpirma aron madayon ang plebisito.

Apan ang DILG kusganong mihimakak niini ug mitug-an nga kun gihisgutan man ang kabahin sa cha-cha ug sa gihimong signature campaign pagbuot kadto sa lokal nga mga lider.