Peke nga abogado gipangdakop sa NBI

Upat ka mga mini nga mga abogado ang natanggong karon human masikop atol sa entrapment operation sa National Bureau of Investigation 7 samtang ang upat nag-atiman sa ilang mga 'kliyente' diha sa dalan Sanciangko ning dakbayan sa Sugbu kagahapon sa hapon.

Ang naaresto mao sila si Antonio Real, Hilarion Galgo, Antonio Binarao Jr. ug Marcelino Inodio sa nahisgutang lugar human sila magpakaaron ingnong mga abogado ug nanawat og notaryo.

Si Real sumala pa migamit sa pangalan sa usa ka Atty. Sergio Monzolin, Jr., si Galgo migamit sa pangalan sa usa ka Atty. Patrick Bendicto, si Binarao migamit sa pangalan sa usa ka Atty. Vernardo Saren ug Atty.Cornelio Anadeo usab ang kang Inodio.

Gawas kang Inodio kinsa miangkon sa sinugdanan palang nakahibalo na nga iligal ang iyang gibuhat, sila si Real, Galgo ug Binarao nangangkong wala sila makahibalo nga ang mga abogadong misugo kanila dili diay tinuod nga mga abogado.

Matud pa ni Inodio mokita siya og P300 ngadto sa P500 nga paigo kaayo sa panginahanglan sa iyang tulo ka anak ug asawa.

Ang NBI mihimo sa ronda gumikan usab sa reklamo sa Integrated Bar of the Philippines Cebu City chapter president nga si Alex Tolentino.

Upat ka NBI agents ang nagpakaaron ingnong mga kustomer diha sa atubangan sa usa ka dakong unibersidad sa dalan Sanciangko ug nagpanotaryo gamit ang marked money nasulod sa laang ang upat.

Sumala pa ni Tolentino nga personal niyang gisubay ang kalihukan sa upat ug gisubay usab ang talaan sa tanang sakop sa IBP didto sa Manila ug natino niyang dili mga abogado ang gipanug-an sa upat.

Gipahimangnoan ni Tolentino ang publiko sa dali pagduol ug pagpailad sa mga mo-notaryo diha sa kadalanan sanglit iligal ang kadaghanan niini. Dutchman nanghasi gidakop Ni Edwin Ian Melecio

Usa ka Dutch national ang gitanggong karon sa karsel sa Guadalupe police station human kini pasanginling nanghasi dihang nahubog ug nangguba sa gate sa usa ka panimalay nga gipanag-iya og enhinyero niadtong nakalabay'ng gabii diha sa Golden Village, Banawa-Guadalupe ning dakbayan.

Ang langyaw giilang si Richard Groeland, 49, lumad nga taga Holland ug kasamtangang nagpuyo uban sa iyang asawa diha sa nahisgutang lugar.

Usa ka engineer nga nagtrabaho sa Cebu First District engineering office nga si Engr. Onorio Pucanan maoy mireklamo batok sa suspek hinungdan sa pagkaaresto niini.

Matud pa ni SPO2 Wenefredo Costelo sa Guadalupe Police sa pakighinabi sa Banat News nga giduol sa suspek ang biktima ug sa walay daghang rason giingnan kini og "I'll kill you!"

Dugang pa sa pasangil nga human siya hulgaa giingong gipatid-patiran pa sa suspek ang panimalay sa biktima.

Kasong paglapas sa city ordinance 1929 kun paghubog-hubog, grave threat, alarm and scandal maoy gipasakang kaso batok sa langyaw kagahapon kinsa nakapiyansa ra dayon matud pa sa kapolisan.