'Nakigkulukadidang' gipatay sa luba

Napatay sa luba ang usa ka lalaking gidudahan sa iyang bayaw nga nakigkulukadidang sa kapuyo sa suspek diha sa ilang pinuy-anan sa Beltran Subdivision, Upper Yati, Quiot ning dakbayan.

Si Antonio Pille, 73 anyos, wala na matabang ug nakabsan sa iyang kinabuhi diha sa Cebu Doctor's Hospital gumikan sa mga samad dinunggaban sa kalawasan.

Naaresto sa mga barangay tanod ang suspek nga si Arcadio Sayson, 68, kinsa igsuon sa asawa sa biktima ug diha nagpuyo sa balay sa naulahi human mohangyong anha lang sila mopuyo kay ang ilang anak motungha na sa high school.

Si PO3 Buenaventura Ursaiz sa pakighinabi sa Banat News mitug-an nga kasamtangang nagkuti-kuti ang biktima sa mga wirings sa iyang panimalay dihang kalit nga gihamagan og dunggab sa suspek makadaghan higayon.

Ang katabang sa biktima nga si Julaude Halit,maoy nakakita sa biktima kagahapon sa buntag nga nagbuy-od na sa ubos sa ilang balay nga daghan og samad dinunggaban sa kalawasan maong iyang gitawag ang anak sa biktima nga si Emma Rama ug maoy midala niini sa Cebu City Medical Center, apan gibalhin kini sa CDH diin pila ka oras nakabsan kini sa kinabuhi.

Usa sa mga testigo (ngalan gipugngan sa Banat News) kinsa giingong nakakita gyud sa pagkahitabo maoy daling mipahibalo sa mga tanod hinungdan sa pagkadakop sa suspetsado ug pagkatanggong sa Cebu City Police Office diin gihikay ang kaso niini. Nakuha usab ang 8.2 pulgadas nga kutsilyo ug gi-turn-over ngadto sa Homicide Section.

Sa pakighinabi sa mga tigbalita kagahapon sa suspek wala siya magmahay sa nahimo sa bayaw gumikan kay dugay na siyang nagdudang dunay relasyon ang iyang 50 anyos nga kapuyong si Francisca Pepito sulod sa usa na ka tuig.

Matud pa ni Sayson duha na sila ka tuig nagpuyo diha sa balay sa biktima human sila mobiya sa Naga, apan giingong kadugayan namatikdan niyang mobangon ang iyang kapuyo ug diha nalang niya maabtan nga nakigkita sa biktima bisan kaadlawon.

Hangtod usa ka adlaw nadakpan niya sa akto nga nag-estorya ang duha apan mismong ang kapuyo niini mohimakak sa iyang nakita, bisan na iyang igsuong asawa sa biktima matud pa niya dili usab motuo sa iyang gitug-an.

Kasong murder maoy gikatakdang atubangon sa suspek karong adlawa diha sa piskaliya. Balay sa kanhi konsehal nasunog Ni Edwin Ian Melecio

Balay sa kanhi konsehal sa lungsod sa Moalboal gilamoy sa sunog ug gibana-banang P600,000 ang danyos ang gibilin sa maong sunog diha mahimutang sa Poblacion East niadtong milabay'ng gabii.

Si Moalboal Fire Marshall SFO3 Roger Lagnason ug maoy miimbestigar sa hitabo sa pakighinabi nagkanayon nga nadawat ang alarma alas 8:20 niadtong Domingo sa gabii ug miila sa tag-iya mao si Luis Redoble, 74, minyo ug nadanyos usab ang balay sa silingan niining si Tampus Lagnason.

Sumala pa sa imbestigasyon wala diha si Redoble sa balay dihang nahitabo ang sunog sanglit miadto siya sa birthday party sa usa sa iyang mga apo layo sa iyang balay. Bugtong nahibilin mao ang uban pa niyang apo nga niadtong tungura nanan-aw og telebisyon.

Matud pa ni Lagnason usa lang ka "bomberong polis" ang napaso sa walang kamot atol sa hitabo, kini mao si PO1 Bismark Babiera gikan sa Badian Police nga miresponde usab.

Wala pa matino sa kabomberohan ang tinuoray nga hinungdan sa maong sunog.

Ang Moalboal duna ray tulo ka mga bombero ug tulo ka dugang tawo gikan sa munisipyo kini ang duha drayber ug usa ka nozzle man. Karong adlawa dugang pa ni Lagnason madawat na nila ang gisaad nga "firecycle" gikan sa Kapitolyo nga dunay dalang mga fire extinguishers.