P70M repair sa karaang city hall gisalikway ni Tom

Gisalikway nang daan ni Mayor Tomas Osmeña ang hangyo sa konseho sa dakbayan sa Sugbo nga mogahin og laing P70 milyones aron makumpleto ang rehabilitasyon sa karaang City Hall building nga pagatawgon na unya og legislative building.

Atol sa pagpakighinabi sa mga tigbalita kang Osmeña kagahapon sa udto deretso niining gi-prangkahan ang mga sakop sa konseho pinangulohan ni Bise Mayor Michael Rama nga dako ra kaayo ang dugang gahin nga gipangayo alang sa maong katuyoan.

Nasayran nga una nang mitiyabaw ang mayor sa P65 milyones nga giaprobahang gahin alang sa himuong pag-repair sa maong edipisyo.

Apan gibutyag ni Rama subay sa gihimong pagtuon ni Konsehal Gabriel Leyson, tsirman sa committee on public works, nga ang gi-aprobahang gahin igo lang kini sa pag-repair sa maong edipisyo ug wala pay labot niini ang finishing, pagbutang ug mga aircon unit sa matag lawak, mga furniture sa matag opisina ug uban pa nga gibanabanang nagkinahanglan usab og P70 milyones.

Nagkanayon ang mayor nga pilion lang niya ang ubang mga kinahanglanon kaayo nga butang nga aprobahang paliton sama sa pagpamalit og mga airconditioning unit alang sa maong edipisyo ug ang uban nga dili kaayo kinahanglanon dili niya kini aprobahan.

Gihulagway ni Osmeña nga gawas nga dako ra kaayo ang kinatibuk-ang gahin nga gikinahanglan karon sa pag-repair sa maong edipisyo gihulagway usab sa mayor nga 80 porsiyento sa mo-okupar sa maong buhatan unya ang mga sakop sa konseho nga usa lang sa 21 ka mga departamento sa Cebu City Hall.