Opposa giplano 'likidahon' sa mga fishing operators?

Planong paglikida kang Visayan Sea Squadron chairman Atty. Antonio Opposa gibutyag naggikan sa pundok sa mga nanag-iya og panagatang komersyal nga migamit og "de zipper" nga gihulagway nga makadaot sa kadagatan.

Si Opposa sa pakighinabi sa Banat News mitug-an nga gipahibalo siya sa usa niya ka suod nga higalang dunay tawong piniyalan diha sa Norte nga nakadungog nga duna nay plano para "likidahon" siya.

Wala niya ibutyag kung si kinsa ang maong tawo nga giingong maoy nagplano niini apan iyang gibutyag nga gipahibalo na niya kini sa NBI Anti Organized Crime Task Force.

Dugang pa niya nga iya gyud kining giseryoso gumikan kay ang nagpahibalo kaniya suod niyang higala ug dili mahitabong pasiawan siya og susama niini ka seryosong butang.

Si Opposa maoy nangusog aron temporaryong tak-upan ang Visayan Marine Triangle ngadto sa mga komersyal nga panagatan sama sa "de zipper" nga gihulagway niyang "destructive" sukad pa kaniadto.

Matud pa ni Opposa angayang lihukon sa Bureau of Fisheries 7 ang pagsusi sa gidaghanon sa mga gipanghatag niining lisensya ug permit sa komersyal nga panagatan gumikan kay nagtuo ang abogado nga naghinobra na kini ug naapektahan na ang suplay sa isda.

Dugang pasangil ni Opposa nga dunay mga lisensya ug permit nga tag lima ka barkong panagatan ang mogamit ug mipasangil sa BFAR nga wala mag-monitor sa "sustainable yield" kun gidaghanon sa isdang mahimong ma-harvest sa matag dapit nga gibutang sa lisensya diin sila mahimong makapanagat.

Ang "sustainable yield" pagpasabot pa ni Opposa mao ang hustong gidaghanon sa isdang mahimong kuhaon nga duna pay paigong gidaghanon sa dagat nga mahibilin aron makapadayon og panganak.

Dugang pa niya nga ang 'de zipper' manulod sa 15 ka kilometrong limit sa kadagatan gikan sa kalungsuran nga diin manginabuhi ang mga gagmay'ng mananagat.

Giangkon ni Opposa nga labaw'ng maapektahan niini mao ang nag-operate sa "de zipper" kun 'Danish Seiner fishing' samtang ang mga tripulante niini mahimo nang makapanagat sa ginagmay'ng paagi .

Si Bantay Dagat Commission chairman Elpidio dela Victoria Jr. mitug-an sa Banat News nga ilang giawhag ang mga lokal nga kagamhanan sa mga naapektahang lugar sama sa Iloilo, Masbate, Santa Fe , Bantayan ug Madridejos sa pagtabang sa mga tripulanteng mataktak sa mga 'de zipper.'