Si Cebu Customs District Collector Ma. Lourdes Mangaoang miingon nga 126 ka bails sa ukay-ukay ang ilang nasakmit.
Miabot ang kargamento niadtong Marso 18 ning tuiga gikan sa nasud sa Taiwan luwan sa M/V Glory nga naka-consign sa ngalang Flor John Merchandise, apan wala ideklarar nga ukay-ukay.
Atol sa pagbukas sa maong 20-footer container van, gipatawag ni Mangaoang ang mga sakop sa Philippine Drug Enforcement Agency- 7 gipangulohan ni Chief Insp. Arcellano Bañares sa pagseguro nga walay drugas nga anaa gipangsuksok sa bulsa sa mga ukay-ukay.
Matud pa ni Mangaoang iya lamang gibasehan ang mando ni Finance Secretary Margarito Teves nga i-hold ang maong shipment gumikan sa taho nga adunay drugas sulod sa maong shipment ug nasuta sa mga K9 dogs nga negatibo sa drugas ang maong kargamento.
Ang kargamento gi-broker sa RR Brokerage nga gipanag-iya ni Ramil Rey Alcoy.
Gipasabot ni Mangaoang nga ang maong shipment posibleng usa lamang ka pagsuway kun makalusot ba ang mga ilegal nga kargamento sumala sa gipasiatab nga pasalig sa usa ka babayeng collector sa kaulohan nga buot mohulip sa posisyon karon nga gihuptan ni Coll. Mangaoang isip Customs District Collector sa Sugbo.
Si Mangaoang, kinsa bag-ohay lang nakadawat og mando gikan ni Teves nga magpabilin siya isip kolektor sa Adwana sa Sugbo, miluwat na og warrant of seizure and detention batok sa maong kargamento.