83-anyos nga beterano misaysay sa kaagi sa American landing sa Talisay

Usa ka 83-anyos nga Pilipinong beterano sa ikaduhang giyera sa kalibutan mapasigarbohong misaysay kagahapon sa nahitabong "takas" o pagduong sa mga sundalong Amerikano sa dakbayan sa Talisay niadtong Marso 26, 1945.

Si John Caballero, kanhi hepe sa Labor Battalion maoy usa sa pinasidunggang bisita sa gipahigayong kasaulogan sa 61st American Landing Anniversary sa dakbayan.

Gibutyag ni Caballero nga usa siya sa mga sundalong napriso panahon sa giyera didto sa Tarlac ug Cabanatuan ug hangtod karon dili niya makalimtan ang iyang pait nga kasinatian sa mga kaaway.

Gihulagway kagahapon ni Caballero ang nahitabong pagduong sa mga Amerikanong sundalo sa baybayon sa dakbayan ug ang ilang mga nasinati sa mga Hapon nga sundalo nga maoy ilang kaaway.

Matud ni Caballero nga dili niya makalimtan nga usa sa iyang mga Corporal nga si Eleuterio Tigbao gituhog og bayoneta sa hapon tungod kay gilangkat niini gikan sa sundalong Hapon ang bandila sa Amerikano nga gihimong putos sa hugaw niining uniporme.

Si Caballero usa ka US citizen nga nagbase sa Los Angeles, California ug matud niya nga mapasigarbohon kaayo siyang mopasundayag sa iyang uniporme nga maoy iyang gisul-ob niadtong giyera sa 1941 ug hangtod sa nahitabong takas sa Talisay sa mga kadagkuan ngadto sa Amerika kun imbitahon siya og mga speech.

Gisaysay ni Caballero nga sa milabay'ng 61 ka tuig ang mga sundalong Pilipino gihimong labor battalion ug siya maoy hepe niini ang ilang trabaho tighakot sa mga patay'ng sundalo.

Matud ni Caballero nga wala silay mga armas bisan na lang gani sundang para makasukol sila sa mga kontra.

Gikan sa Talisay paingon ngadto sa Naga, ni Caballero, pa gilubngan og mga land mines sa mga hapon.

Apan si Caballero mipadayag usab sa iyang pagmahay sa mga Amerikano tungod kay ang benepisyong makuha nilang mga Pilipinong sundalo dili patas sa mga Amerikano. - Brenda D. Batuto