Piggery duol sa subdivision gireklamo sa mga molupyo

Wa na kaantos ang mga molupyo sa usa ka subdivision sa Pook, Talisay City gumikan sa kabaho sa "piggery" sa ilang palibot busa mikiha kini ngadto sa buhatan sa mayor sa dakbayan.

Matud pa sa mga kihante nga nalantawan nila ang dakong kadaot nga mahitabo sa ilang panglawas gawas lang kon mohimo'g lakang niini si Mayor Socrates Fernandez.

Si Jesus Osorio Jr., presidente sa Puwerto del Sol Homeowners Association (PDSH)A sa Pooc miingon nga bisan naa sa gawas sa subdivision ang maong piggery, apan ang kagrabe sa baho sa hugaw sa baboy naa mapunting kanila ilabi na kon mopabor ang hangin sa ilang lugar.

Maoy hinungdan matud pa ni Diosdado Bongas Jr., vice president sa PDSHA nga maglisod sila pagginhawa kay mokolikot gyud sa ilang ilong ang baho.

Maglisod usab sila pagkatulog ilabi na sa kagabhion gumikan sa kabaho sa ilang palibot.

Labaw sa tanan maglisod na sila pagkaon gumikan sa baho ug kanunay lang maglood ang ilang ginhawaan.

Matud pa sa mga pitisyoner nga ang labing gikabalak-an nila mao ang panglawas sa ilang mga gagmay nga mga anak.

Gihangyo sa mga pitisyoner si Fernandez pinaagi sa ilang kiha nga gipetsahan og Marso 10, 2006 nga maayo untang ipaimbestigar sa buhatan sa City Health Department ang maong piggery.