Gisugo dayon ni Osmeña si City Information Officer Nagiel Bañacia aron maoy mopahibalo ngadto kang Gobernador Gwen Garcia kabahin sa mao niyang plano aron maka-abot dayon kini ngadto sa mga mayor sa lainlaing kalungsoran ug dakbayan.
May labot kini sa programa sa mayor nga "Balik-Lungsod Activity" atol sa pagpahigayon unya sa 12th ASEAN Summit dinhi sa Sugbo karung bulan sa Disyembre human pormal nga giaprobahan ni Presidente Gloria Arroyo ang hangyo ni Osmeña nga ideklarar ang upat ka adlaw nga holiday sa Metro Cebu atol sa maong international nga kalihukan.
Nadawat na sa mayor ang kopya sa deklarasyon sa four- day holiday nga gipirmahan ni Executive Secretary Eduardo Ermita subay sa Proclamation No. 1032 nga gipirmahan niadtong Marso 10.
Gipasabot sa mayor nga tuyo niya nga madasig pagbakasyon ang mga Sugboanon ngadto sa ilang lainlain nga mga probinsya atol sa maong kalihukan hinungdan nga gigahinan niya sa maong pundo ang mga lokal nga kagamhanan sa kalungsoran aron mokooperar sa maong programa.
Tinguha sa mayor nga mopalabang og supplemental budget alang sa maong katuyoan nga paghatag og tag P100 mil ngadto sa mga lokal nga kagamhanan sa kalungsoran.
Tipik kini sa tuyo ni Osmeña nga pag-decongest kun pagluagluag sa suliran sa trapiko dinhi sa dakbayan sa maong mga adlaw aron maplano og maayo ang paghatag og higpit nga seguridad sa mga bisita nga 17 ka mga pamuno nasud sa lainlaing kanasuran nga motambong unya sa maong summit.
Napanglantawan sa mayor nga molambo unya og maayo ang ekonomiya ug turismo sa Sugbo kun magmalampuson ang maong international nga kalihukan gumikan kay pinaagi unya niini mosamot og kakumbinser ang mga langyaw'ng bisita nga luwas ug malinawon ang Sugbo itandi sa ubang mga dapit dinhi sa nasud.