Wala kaugpo sila si SPO2 Jerry Villarin, PO3 Estanislao Avenido and PO2 Godofredo Amancio atol sa entrapment operation sa NBI pinanguluhan ni executive officer Ernesto Macabarre sulod sa usa ka kan-anan sa dalan M. Velez duol sa Palace of Jusctice kagahapon sa hapon.
Matud pa nga ang NBI naniid na sa tulo niadto pang nakalabay'ng semana gumikan sa usa ka reklamo nga gipasaka ni Elizabeth Gallarde, 57, nga taga Poblacion East, lungsod sa Moalboal.
Si Gallarde midangop sa NBI ug mireklamong gikilkilan siya sa maong mga polis human maaresto ang iyang anak nga si Mark James, 21, niadtong Marso 6 gumikan sa kasong pagpangawat, apan giingong gimaniobra sa tulo nga "buy-bust operation" ang nahitabo.
Nunot niini si Gallarde mipasangil nga gipangayuan siya sa mga suspek og P80, 000 aron ma-settle nalang ang kaso samtang laing P20, 000 na usab ang gikatahong gipangayo sa hepe sa police station.
Gumikan niini matud pa ni Gallarde nga napugos siya og baligya og lote nga gipanag-iya sa ilang pamilya diha sa Moalboal apan nausab ang iyang huna-huna ug gisumbong hinuon kini kang Mayor Inocentes Cabaron kinsa maoy mitudlo kaniyang sa NBI siya padangpon.
Matud pa ni Gallarde nga mihatag siya sa NBI og P15, 000 aron maoy gamitong marked-money sa operasyon.
Dihang nadawat ni Avenido ang kwarta nakugang nalang kini dihang kalit nga midugok ang mga ahente sa NBI kaniya ug giaresto lakip na ang mga kauban.
Si Avenido mihimakak nga nadawat ang salapi gikan kang Gallarde ug mipasangil hinuon nga gi framed-up sila niini sanglit gi-textsan siya ni Gallarde nga dunay ihatag kanila.
Samtang si Villarin kusganon usab nga mihimakak sa pasangil matud pa niya nga ila na ganing gikasuhan ang anak ni Gallarde sa Provincial Prosecutor's Office.
Matud pa niya nga miadto sila sa Provincial Prosecutor's Office aron tiwason ang paghikay sa kaso sa anak ni Gallarde gumikan kay mi-expire na ang 10 days waiver of detention niini.
"Wala mi mangayo bisan ka usa nalang. Ka pobre ana nila," asoy pang Villarin. Apan ang ginang nga Gallarde miinsister nga ang mga polis nangayo sa maong kantidad aron isibog ang kaso.
Samtang ang hepe sa Moalboal nga si Chief Inspector Carmelita Condevillamar daling misusi sa NBI human mahibaw-i ang nahitabo sa iyang mga sakop, gipanghimakak usab niya ang alegasyon ni Gallarde nga nangayo siya og P20, 000.
Ang director sa NBI nga si Medardo De Lemos nagkanayon nga ilang subayon ang rekord sa prosecutor's office kun nakiha ba gyud ang anak ni Gallarde samtang gisusi na kung unsay ipasakang kaso sa tulo.