La Niña gikalipay sa Central Visayas Farmers - DA -7

Giisip sa kadagkoan sa kagamhanan nga debuenas alang sa taga Central Visayas nga mag-uuma kining La Niña.

Kini samtang giisip kining dimalas alang sa taga Eastern Seaboard tungod kay tua man didto ang mga grabeng baha, lunop, pagpanahili sa yuta ug uban pang katalagman ning La Niña nga panahon.

Si Regional Director Eduardo Lecciones sa Department of Agriculture (DA-7) miingon nga usa sa nakapasuwerte sa taga Central Visayas nga mga mag-uuma mao ang pagsagop nilag sayo sa gitawag nga "panuig".

Kining panuig matud pa ni Lecciones kasagaran anha kini mahitabo sa mga buwan na sa Hunyo matag tuig, kay mao kini ang kasagarang ihugpa sa tinguwan.

Midugang si Lecciones nga alang sa mga mag-uuma og mais, ang panuig maoy gipaabot nilang makabaton silag daghang ani tungod kay maayo og tubo ang mga mais ning maong panahon.

Gipasabot sa mga batid sa agrikultura nga ang kapagba sa yuta gumikan sa huwaw nga mahitabo sa buwan sa Pebrero hangtod Mayo matag tuig maoy makapatambok sa yuta sa panahong moabot na ang tinguwan.

Mangamatay usab ang mga mananap sa yuta nga tigdaot sa mais ug uban pang mga tanom, hinungdan nga maayo kaayo og tubo ingon man ang bunga sa mga tanom sa panahon sa panuig.

Matud pa ni Lecciones nga mas sayo karon ang tingpugas sa mga mag-uuma og mais alang sa panuig tungod kay wa may bugto ang uwan busa wala usay huwaw nga mahitabo karong tuiga.