Balay kahilayan pasirad-an ni Tom

Usa ka iladong balay kahilayan dinhi sa dakbayan sa Sugbo ang girekomendar sa Revenue Monitoring Task Force ngadto kang mayor Tomas Osmeña nga pasirad-an gumikan sa daghang mga kalapasan niining nahimo sa mga gipatumang balaod sa dakbayan.

Ang maong bar (ngan sa establisamento gipugngan una) nga nahimutang diha sa may General Maxilom Avenue nga gi-representahan ni Marianne Bautista girekomendar nga pasirad-an human masakpan sa monitoring task force nga gipangulohan ni Cristopher Ong nga nag-operate nga walay business permit karong tuiga ug ingon man wala usab kini makabayad og buhis.

Subay sa record gikan sa City Treasurers Office niabot og P86,791.35 ang utang sa bayranan sa business tax sa maong balay kahilayan ngadto sa City Hall.

Ang closure order batuk sa maong establisamento pormal nang giduso sa lamisa ni Mayor Tomas Osmeña kagahapon sa buntag ug human unya kini kapirmahi pormal dayon kining ipatuman sa mga sakop sa monitoring task force.

Niadtong miaging tuig ubay ubay nga mga establisamento dinhi sa dakbayan ang napasirad-an human masakpi nga nag-operate nga walay permit ug ang uban fake ang permit niining gigamit ug wala magbayad og buhis.

Apan kadaghanan sa maong mga establisamento ang nakabukas og balik sa ilang operasyon human kini nibayad og multa ug ni-kooperar sa gipahigayong imbistigasyon aron pagtumbok ilabina niadtong nagpasiugda og mga fake nga business permit.

Nasayran nga duna nay pipila ka mga kawani sa City Hall ang napasakaan og kaso sa korte human masuta ang kalambigitan niini sa maong pag-fake sa mga business permit.