Provincial Intelligence reklamo's CIDG-7

Mireklamo na ang hepe sa Provincial Intelligence and Investigation Branch, Supt. Juanito Enguerra, batok sa Criminal Investigation and Detection Group 7 sa wala pagduso og report sa imbestigasyon sa kaso sa pagtulis sa LandBank sa lungsod sa Bogo.

Ang reklamo ni Enguerra iyang giduso ngadto sa Regional Intelligence and Investigation Division sa Police Regional Office 7.

Dungan sa iyang reklamo ang rekomendasyon nga ang RIID maghulma og Task Force nga mohimo og dugang imbestigasyon sa kaso sa pagtulis sa LandBank lakip na sa pito ka kasong murder sa lungsod sa Bogo nga wala masulbad.

Ang CIDG-7 maoy nipuli sa Cebu Police Provincial Office sa pag-imbestigar human nilikay si Sr. Supt. Vicente Loot gumikan sa isyu sa politika sa ikaupat nga distrito sa lalawigan sa Sugbo.

Usa sa reklamo ni Enguerra mao ang pagpakawa'y-sala sa CIDG7 kang Bogo Mayor Celestino Martinez III sa kalambigitan sa kaso bisan gitumbok kini sa mga nadakpan nga suspek nga maoy utok sa krimin.

Matud pa ni Enguerra nga napakyas ang CIDG-7 sa pagsusi sa sim cards sa suspek nga si Joel Sumabong diin nabutang ang cellphone number ni Martinez nga kompirmado sa Smart Telecom isip post paid subscription ug special number.

Wala usab susiha sa CIDG-7 ang gitumbok ni Sumabong nga tawo nga nidala sa P9.4-milyones ug kon diin kini tagoi.

Wala usab giimbestigar sa CIDG-7 ang laing suspek nga si Roy Ylanan nga security personnel ni Martinez ug kawani sa munisipyo nga nadestino sa human settlement building diin ang mga suspek giingong gipakaon sa wala pa ang tulis sa bangko.

Si Enguerra nipadayag sa iyang kasagmuyo nga ang gituohan hinoon sa CIDG-7 mao ang wala magkadimao nga pamahayag sa mga suspek ug gipatawag pa si Martinez sa ilang buhatan dayun gilimpyohan ang iyang pangalan.

Gikwestiyon usab ni Enguerra ang presensiya ni Atty. Inocencio dela Cerna, ang giingong legal adviser sa CIDG-7 kinsa suod nga higala ni Atty. Edgar Gica, ang abogado sa mga Martinez.

Nasayran nga si dela Cerna pa ang niatubang sa media atol sa press conference sa dihang gilimpyohan sa CIDG-7 ang pangalan ni Martinez sa kalambigitan sa kaso.