Gwen motabang; operasyon batok NPA nagpadayon

Gipasalig ni Gobernador Gwendolyn Garcia nga tabangan ang nailong banay sa napatay nga sakop sa 78th Infantry Battalion nga namatay sa engkuwentro diha sa lungsod sa Tabuelan niadtong miaging adlaw.

Sa pakighinabi sa Banat News kagahapon ang gobernador mitug-an nga iya nang gimandoan si Marivic Garces, Provincial Social Welfare Development Office (PSWDO) chief sa pagsusi kung unsay gikinahanglan sa kabanay ni PFC. Rey Venturanza.

Si Venturanza sakop sa grupo sa Charlie Company pinanguluhan ni Lt. Jerry Chris Mendoza kinsa maoy nakaengkwentro sa grupo sa 15 ngadto sa 20 ka mga sakop sa New Peoples Army niadtong nakalabay'ng adlaw diha sa Sitio Kalumbrisan, Barangay Dalid sa nahisgutang barangay.

Lakip sa napatay mao ang duha ka gidudahang sakop sa NPA nga si Gerry Badayos (dili Jimmy Badayos nga unang gibutyag sa militar ug kapolisan) nga dunay mga alyas nga Ka Warren ug Ka Vassily. Si Gerry anak ni Jimmy Badayos, usa ka lider sa militanteng pundok kinsa gidakop kaniadtong tuig 1990 sa Metrodiscom ug giingong nakaeskapo apan hangtud karon wala na igkita sa iyang mga kabanay. Napatay usab ang kauban ni Gerry nga si Guillermo Alburo alyas Ka Jed.

Si Badayos usa ka kanhi sakristan gitumbok ni 78th IB Battalion Commander Lt. Col. Jessie Alvarez nga maoy secretary - general sa Front Two sa kalihukang NPA nga naglihok dinhi sa Sugbu. Naglakip niini ang panginahanglang pinansiyal sa pamilya ug ang galastohan sa pagpadala sa patay'ng lawas niini ngadto sa dakbayan sa Iloilo.

Gipadayag ni Gobernador Garcia nga dalaygon kaayo ang gihimo ni Pfc Rey Venturanza sanglit gituman niini ang iyang kaakohan sa pagpatuman sa kahapsay ug kalinaw sa lalawigan nga buot gub-on sa mga terorista ug mga kumunistang sakop rebeldeng New People's Army.

Dugang niini si Garcia kinsa mao usab ang chairperson sa Regional Peace and Order Council (RPOC) 7 ang mipadayag sa paghatag pa ug dugang mga sakyanan sa kapolisan karong sunod nga bulan.

Matud pa niya nga ang insidente pagmatuod lang nga dako ang importansya sa presensya sa maong batalyon sa Sugbo.

Samtang ang inahan ni Gerry Badayos nga si Elisa sa pakighinabi sa usa ka lokal nga sibyaanan wala mokumpirmar nga lider sa rebeldeng kalihukan ang iyang anak apan miangkon nga dili na niya ikatingalang himuon lider ang iyang anak sa susamang kalihukan gumikan kay maayo kining anak ug dili abusado.

Gani matud pa ni Eliza kinsa usa usab ka sakop sa militanteng pundok ,iyang gisaluduhan ang gisangputan sa iyang anak gumikan kay bisan sa kamatayon niini daghan gihapon kining natabangang nilupigan gumikan sa inhustisya.

Atol sa maong engkwentro usa ka giingong amasonang giilang si Ka Tanya nga gitumbok nga asawa ni Badayos ang nasamdan sa engkwentro ug gipangita na karon sa mga awtoridad kun diin dad-ang tambalanan. Sinungagay, motor batok trak usa patay, tulo angol Ni Brenda Batuto

Usa ang patay, tulo ang naa sa kritikal nga kahimtang ug laing tulo ang angol dihang usa ka motorsiklo ang mibangga sa Isuzu elf truck niadtong Domingo sa buntag diha sa Sityo Ilag, Cantabaco, Toledo.

Ang nahisgutang motorsiklo naugdaw tungod kay misilaob kini human sa pagkabangga.

Si Mario Zabate, 22-anyos, taga Gimbawian, Pinamungahan gideklara sa doktor nga patay na nga naabot sa tambalanan.

Si Zabate uban ni Quirino Fuentes, 20, taga Pinamungahan nga nag-angkas sa Ramjet RM 100 nagtangag sa plakang IK-2917 nga gimaneho ni Brylle Ian Sanchez, 19, taga Lamac Pinamungahan.

Si Sanchez ug Fuentes anaa karon sa kritikal nga kahimtang lakip na si Clifford Alegado, 23-anyos, taga Barangay Bulacao Talisay, drayber sa maong truck nga nagtangag sa plakang 7C-W-970.

Ang laing mga naangol kinsa sakay sa trak sila si Gloria Alegado, 46, Virginia Roxas, 40, ug Pilo Jane Roxas, 18, pulos taga Bulacao, Talisay.

Gibutyag kagahapon ni PO3 Lorenzo Mahilom, traffic section police sa Toledo sa Banat News nga ang nahisgutang trak gikan sa dakbayan sa Talisay nagtangas paingon sa Don Andres Soriano Toledo ug pag-abot sa maong lugar mihunong kini sa kurbada nga karsada para paunahon ang motorsiklo nga gimaneho ni Sanchez.

Matud ni Mahilom nga ang motorsiklo milapas sa center imaginary line ug mi-overtake kini sa laing sakyanan nga nagbiyahe sa sukwahing direksiyon hinungdan nga nabangga hinoon sa atubangang bahin sa trak.

Tungod sa ka kusog sa pagkabangga sa motorsiklo nalabay kini ug kalit nga misilaob ug ang drayber ug mga angkas nalabay usab sa karsada.

Si Mahilom midungag nga ang trak maayo usab nga pagkalumping sa atubangang bahin ug nagupok ang windshield niini hinungdan nga ang mga sakay sa atubangan lakip ang drayber naangol.-Brenda D. Batuto Bisag kidhat ug taghoy mahimong makapapriso Ni Wen Celen

Higpit na kaayo karon ang balaod bahin sa sexual harassment hinungdan nga kun ang usa ka lalake tinuoray nga naibog sa usa ka babaye kinahanglan piyongon nalang niya ang iyang mga mata o kaha ikakiha siyag "sexual abuse".

Mao kini gipasabot ni manlalaban Ariel Bacatan, hepe sa Civil Service Commission (CSC) kinsa nagkanayon nga bisan ang pagkihat, pagpanihoy, pagpanguhit sa usa ka lalake ngadto sa usa ka babaye, igo na kaayong mapakakonbikto sa nahauna kon kapamatud-an.

Matud pa ni Bacatan nga ang balaod sa CSC bahin sa "gender equality and development," gituyo gayud pag-umol sa maong ahensya nunot sa kauyonan sa batakang balaod aron paghatag og maayong proteksyon sa mga babaye o kaha lalake nga hasulon sa kaatbang nilang sex.

Miingon si Bacatan nga kon ang balaod bahin sa sexual abuse diha sa konstitusyon sobra ra ka lapad o heneral ang pagpasabot niini, diha sa version niini sa CSC giklaro gyud nga bisan unsa ka gamay sa mahimo sa usa ka tawo kon kana makapa"-offend" o makahasol sa laing partido, pilit gyud nga panubagan sa nagpasiugda sa maong kaso.

Busa giawhag ni Bacatan ang tanang mga lalake kinsa abuton gyud og hilabihang kaibog sa usa ka babaye, kinahanglan piyongon lang niya ang iyang mga mata ug pugngan gyud ang iyang baba ug dila gikan sa pagsulti o kaha ang mga kamot ug tiil, gikan sa pagpanghikap aron nga dili mapriso.