4 ka tawo nanguykoy sa dagat nadakpan

Upat ka mga tawo nga nagsakay og pumpboat ug mangoykuyay og balas nasikop sa kapolisan sa Samboan alas 11 sa gabii niadtong Biyernes sa Sitio Sigsag, Poblacion ning lungsod.

Gipangulohan ni Inspector Marlon Gumabaw sa Samboan Police Station, nasignit nila si Henry Peronel, 47, Reynaldo Abeso, 42, Christopher Sablan, 22, pulos minyo, ug Ryan Greg Sereno,22, ulitawo, ang upat pulos nanimuyo sa Talisay, Santander.

Matud ni Gumabaw nga nahinabi sa Banat News kagahapong adlawa nga ilang nakuhaan og 20 ka sako nga balas (peebles) nga didto gikuykoy sa ilawom sa dagat.

Midugang siya nga dugay na nilang gipanid-an ang kalihukan sa upat, hinungdan nga naaktuhan gyud nila nga nanawom ug nanguha og mga balas.

Ang upat ila nang gitanggong sa karsel sa bilanggoan ug ila na usab nga pasakaan og tukmang kaso karong adlawa ngadto sa piskaliya.