Mibarog sa trak nangihi, nahulog

Patay ang usa ka 19-anyos nga lalaki human kini mahagbong gikan sa ten wheelers truck nga iyang gisakyan niadtong Sabado sa gabii diha sa Abogon, Sibonga.

Si Ritchie Albaracin, residente sa Colawin, Argao trabahador sa poultry farm ni Dinalos Tecson diha sa Guiwanon sa nahisgutang lungsod ug tag-iya usab sa maong trak daling gidala sa iyang mga kauban sa Carcar District Hospital apan gideklarar kini sa doktor nga patay na nga naabot sa maong tambalanan.

Gibutyag ni PO2 Pederlino Bacusmo, traffic investigator sa Argao Police kagahapon sa Banat News nga si Albaracin mibarog kini ug nangihi samtang nagdagan ang trak.

Ang nahisgutang sakyanan miliko sa kurbada nga lugar hinungdan nga nalabay si Albaracin diha sa karsada ug maayong pagkabunal sa ulo niini ug gituhoan nga maoy hinungdan sa iyang kamatayon.

Si Terso Sarael, 35-anyos, taga Guiwanon,Argao kinsa drayber sa trak boluntaryong mitahan sa iyang kaugalingon sa kapolisan sa Sibonga.