Tungod sa babaye mag-agaw gipamusil, usa ang patay

Patay ang usa ka lalaki ug laing usa ang naa karon sa tambalanan human kini unaya sa pagpusil sa ilang ig-agaw tungod sa babaye niadtong Sabado sa kadlawon diha sa Barangay Alegria, Sibonga.

Ang mga biktima mao si Jimboy Bravo, 27-anyos, minyo ug ang ig-agaw niining si Jolito Diamante hingkod ang panuigon minyo usab, pulos mga residente sa nahisgutang lugar.

Si Bravo nakaangkon ug samad pinusilan sa tuong bahin sa dapi-dapi og ang bala milahos sa ibawbaw sa iyang pusod ug dali kining gidala sa Tuburan District Hospital lakip si Diamante kinsa nakaangkon lang og tapsing sa bala sa walang bahin sa lawas.

Si Bravo gibalhin sa Vicente Sotto Memorial Medical Center niining dakbayan tungod sa kahimtang niini apan gideklara kini sa doktor nga patay na nga naabot sa maong tambalanan.

Si Pablo Paez, hingkod ang panuigon, minyo, residente usab sa lugar, ig-agaw sa mga biktima maoy gitumbok nga mipusil sa duha, daling miikyas human sa maong hitabo.'

Si SPO3 Lino delos Santos, officer in charge (OIC) sa kapolisan sa Tuburan sa Banat News kagahapon nga ilang gikatahapan nga ang tulo nag-away tungod sa babaye.

Matud ni delos Santos nga ang mga biktima gikan sa usa ka disko diha sa lugar.

Human sa disko misakay si Bravo sa iyang motorsiklo ug angkas si Diamante paingon na untang mopauli kalit nga miduol si Paez ug sa walay pangutana gipusil ang duha.