Tanod migukod sa m-cab gipusil

Usa ka barangay tanod nga napusilan human migukod sa multicab nga milikay sa pagrikisa sa kapolisan atol sa checkpoint sa miaging gabii sa barangay Quiot.

Ang biktima mao si Cleofe Murillo, 45 anyos, minyo ug barangay tanod sa nahisgotang dapit.

Ang suspetsado mao si Razom Dayupay, hingkod ang panuigon nga nagpuyo usab sa maong dapit.

Si PO2 Julius Mabunay sa Homicide Section sa kapolisan sa dakbayan sa Sugbo nga gikahinabi sa Banat News miingon nga kuyog sa biktima ang mga polis nga nagpahimutang sa ilang checkpoint sa maong dapit ug dihang gipahunong ang usa ka multicab kalit na hinuon kining mipabulhot pahilayo.

Si Murillo nga maoy dali nga nakasakay sa motorsiklo maoy naggukod sa multicab apan gipusil ang biktima ug naigo gayod ang walang bahin sa iyang abaga.

Dali nga gihatod ang biktima sa Vicente Sotto Memorial Medical Center sa dakbayan sa Sugbo ug luwas na kini sa makuyaw nga kahimtang.

Sumala pa ni PO2 Mabunay nga sa follow up nga gihimo ilang nailhan ang suspetsado nga nakasibat ug padayon kining gipangita.