3 ka trak nga kahoy gi-release sa hepe

Gikuwestyon sa konseho sa lungsod sa Samboan ang pag-release sa hepe ning lungsod sa tulo ka mga trak nga nadakpan niadtong Marso 2 ning bulana nga puno sa mga kahoy nga gidudahang ilegal gumikan sa kakuwang og dokumento.

Si Bise Mayor Rogelio Capa miasoy sa Banat News kagahapong adlawa nga ilang gipatawag ang ilang hepe nga si Inspector Marlon Gumabaw sa ilang sesyon nianang pagka-Lunes sa hapon, tulo ka adlaw human madakpi sa hepe ang tulo ka mga trak nga puno sa kahoy.

Matud ni Capa nga iyang nahibaw-an ang maong mga kahoy nga naggikan sa Sibonga nga gipanag-iya ni Estelita Natividad nga padung unta i-deliver sa Escalon Export ni Eosalie Desvaux, asawa sa usa ka German nga adunay woodcraft sa maong lungsod.

Midugang si Capa nga gibatil niya og pangutana ang hepe uban sa mga sakop sa konseho, tungod kay sa tulo ka mga trak usa lang ang nakarehistro ug ang duha walay rehistro apan gi-release sa hepe pagka-alas 11 sa buntag, nga giisyuhan lang og temporary operation permit (TOP).

Giklaro ni Capa nga gusto niyang limpyohan ang iyang kaugalingon kalabot sa maong isyu human siya nakadungog og mga tabi-tabi sa mga lumolupyo sa maong lungsod nga "nahalin kuno ko sa tag-iya sa kahoy ug ang hepe diri."

Mapasalamaton si Capa ngadto sa tagdumala sa Escalon Export tungod kay dako kini og buhis sa ilang lungsod gumikan sa kadako sa ilang negosyo ug nakapatrabaho pa kini og dili mominos 40 ka mga tawo.

Si Gumabaw nga nahinabi sa Banat News miingon nga iyang gi-release ang tulo ka mga sakyanan nga ilang nadakpan nga nagkarga og 610 ka buok kahoy human makapresentar ang tag-iya sa saktong dokumento.

Matud niya nga gilain lang og sabot sa mga sakop sa konseho ang pag-release sa kahoy.

Si Konsehal Jeffrey Catipay ning lungsod miingon nga ilang gitinguha karon sa konseho ang pagpadala og suwat ngadto sa Department of Environment and Natural Resources (DENR) ug dili sa buhatan sa CENRO sa Provincial Capitol aron maoy mosusi kabahin sa subsob nga pag-deliver sa mga kahoy nga naggikan sa Sibonga.