28 motor gi-impound sa MCPO

Gidakop sa mga polis sa dakbayan sa Mandaue ang 28 ka motorsiklo sa checkpoint nga ilang gihimo sa miaging gabii human ang mga drayber nga nagdala niini walay lisensiya, rehistro ug ang pipila napakyas usab sa pagsul-ob og crush helmet.

Ang checkpoint nga gihimo sa kapolisan nga gipangulohan ni Supt. Emmanuel Ughoc ang ilang gihimo sa national road sa Basak, Mandaue.

Maoy kauban nila ni Ughoc ang mga sakop sa kapolisan sa maong dakbayan nga sakop sa Mobile Patrol Group, Special Weapon and Tactic ug uban pa.

Kini ilang gihimo isip sa pagsanong sa awhag ni Mayor Thadeo Ouano sa pagpakgang sa pundok nga mohimo sa pagpanulis sa maong dapit.

Si Senior Superintendent Eduardo Catabas ang nagtinguha karon sa pagpangayo og suporta sa mga driver sa PUJ ug multicab nga pasaheroan nga nagbiyahi sa dakbayan sa pagtabang kanila.

Si Catabas mimando sa mga lig-on nga police visibility sa kadalanan sa dakbayan alang sa dinaliang pagtubag sa alarma sa mga tulis sa sakyanan.