Ungo nagpakita

Mga lumolupyo sa Camputhaw sa luyong bahin sa Perpetual Soccour Hospital sa dakbayan sa Sugbo gibati og kahadlok sa pagtumaw sa panahon sa gabii sa katingalahang tigulang nga babaye nga ilang gidudahang ungo.

Si Arnold Bustamante nga magsisibya sa DyHR nga nagpuyo usab sa maong dapit maoy misugilon niini sa Banat News kagahapon.

Matud pa ni Bustamante nga dugay na nga gihungihong ang pagtumaw sa ungo sa maong dapit tungod sa dili gayod kasarangang pag-uwang sa mga iro sa panahon sa gabii.

Dugang pa niya nga misamot ang ilang kalisang sa mga lumolupyo dihang ang pundok sa mga batan-on sa maong dapit niadtong miaging gabii mao na gayod ang nakakita niini.

Sumala pa ni Bustamante nga gisugilon sa mga batan-on sa ilang dapit nga nakakita nga nagkalkag ang tag-as nga buhok sa maong tigulang nga babaye ug nagtuwad.

Ang mga iro nga nakakita niini ang miuwang usab nga nakapalimbawot gayod sa ilang balahibo sa hilabihang kahadlok ug nagkatibulaag kini sa pagpanagan.

Si Bustamante miingon nga usa sa ilang mga silingang babaye nga miduol gayod sa maong tigulang nga babaye apan kalit lamang kining mawagtang maong sa lugar.

Show comments