Estorya sa mga katalagman di patuohan sa Pagasa

Gibadlong sa mga otoridad sa panahon ang publiko sa dili dayon pagtuo sa unsa mang mga estorya nga way klaro.

Matud pa ni weather specialist Mario Sarbida sa Philippine Atmospheric Geophysical and Astronomical Services Administration (PAG-ASA) Mactan nga daghan na kaayong nadisgrasya ug naamong gumikan lang sa pagtuo sa mga balita nga way basihanan.

Ang maong pamadlong gihimo ni Sarbida nunot sa nabaniog nga pagpamakwit sa mga molupyo sa Talisay, niadtong miaging semana kay nahadlok nga hapakon og tidal wave ang ilang lugar.

Gani pagbalik na sa uban ngadto sa ilang panimalay, nahawan na ang ilang mga aplayanses kay gipangkawat.

Sa samang higayon gibasol usab ni Sarbida ang mga bilyako kaayong tiggamit og cell phone kay mao kini usahay magmugna og mga balitang binuang.

Nasayran gikan kang Sarbida nga dili lamang taga Talisay City, dinhi sa Cebu ang gisabwagan og bakak nga balita niadtong Marso 13, kundili bisan ang taga Surigao.

Maoy hinungdan matud pa ni Sarbida nga kun may angayang maigo og tidal wave, way lain kundili ang Surigao sanglit nag-atubang man kini sa kadagatan sa Pasipiko.

Apan ang kadagatan sa Talisay, layo ra kaayo sa kamatuorang maigo kinig tidal wave tungod kay gilibotan kini sa mga isla sa Mactan ug Bohol.

Maoy hinungdan nga gibadlong ni Sarbida ang kadaghanan sa dili pagdalidali pagtuo sa mga balitang binuang.

Ang angayang tuohan sa tanan mao ang Pag-asa ilabi na kun moawhag na kini pagpabakwit sa mga molupyo nga naa tampi sa kasapaan ngadto sa mga luwas nga lugar panahon sa tinguwan.

Kini aron pagsiguro nga inig-abot sa baha, siguradong luwas na ang matag pamilya gikan sa katalagmang makamatay.