Giaping pagpusil - patay

Patay ang usa ka traysikad drayber nga nangindahay mokita og salapi sayo sa buntag apan kamatayon hinuoy iyang nakaplagan diha sa pantalan sa dakbayan sa Danao kagahapon sa kaadlawon.

Ang biktima giilang si Orlando Laurente Lawas alyas Kulong, 30, minyo ug molupyo sa dalan Duterte barangay Suba sa samang dakbayan samtang gitumbok nga mipusil patay sa biktima mao si Ronald Edra Batican, 22, taga Sitio Tabok Barangay Maslog sa samang dakbayan.

Si SPO1 Jose Relampagos sa pakighinabi sa Banat News nagkanayon nga personal nga panagbangi ang motibo sa pagpatay. Si Lawas kasamtangang nagpaabot og pasahero dihang kalit nga gidul-itan og pusil sa aping sa suspek, patay na kining nadangat sa tambalanan samtang nakaikyas ang mamumuno.