'Kawo' sa ikaduhang gubat sa kalibutan nakit-an sa dagat

Mga professioal divers kinsa mi-dive sa Lagundi Reef diha sa Barangay Poblacion Talisay nakakuha og kalo sa sundalong gituohan nga usa sa mga sakop ni General Douglas McArthur nga mi-landing diha sa baybayon sa siyudad niadtong Marso 26, 1945.

Ang nahisgotang kalo nga nakit-an sa mga diver niadtong Domingo natugkan na og mga sisi tungod sa kadugay na niini sa ilawom sa dagat apan wala gihapon kini maguba ug magisi.

Si Konsehal Shirley Belleza tsirman sa komitiba sa Turismo, Kultura ug Kasaysayan nagkanayon kagahapon nga ang maong kalo nagpamatuod nga ang "Takas" o pagdunggo sa mga sundalong Amerikanhon niadtong ika-duhang giyera sa kalibutan nahitabo gyud diha sa kabaybayonan sa dakbayan.

Sila si Anthony "Bong" Nator ug Alfie Fernandez mga miyembro sa Talisay City Swimming and Life Saving Association maoy nakakita sa maong kalo.

Si Belleza nagkanayon nga ang nahisgotang kalo usa ka historic artifact ug naatol kining napalgan sa nagsingabot nga pagsaulog sa American landing sa siyudad.

Karong petsa 26 niining buwana ang dakbayan magsaulog sa ika-61 nga selebrasyon sa "Takas". Ang kalihim sa turismo nga si Ace Durano gilauman nga motambong sa maong kasaulogan.