Ang mga suspek naghilam na karon sa karsel giilang sila si Michael Jaducana, 30, taga Puntod Mambaling , Lemuel Abellana, 30 anyos, taga Sawang-Calero, Julius Loquinte, 20, ug Jimwel Abellana, 18 anyos taga Lawis, Mambaling.
Ang upat maoy gidudahang responsable sa daghang insidente sa pagpanulis diha sa nahisgutang lugar ug ubang parte sa dakbayan gamit ang ilang multicab nga may plakang YBY-219 nga may kolor nga dark green sa krimen.
Usa ka Glenn Morales, 22, taga barangay Duljo-Fatima ning dakbayan ang ulahing nabiktima sa mga suspek apan kini daling nagpakitabang sa kapolisan human siya himulbuli sa iyang pitakang may sulod nga P2,500, cellphone nga 3315 nga nagkantidad og P3,000.
Ang mga suspek naabtan sa grupo nila ni PO2 William Dumaquit, PO1 Renato Noval Jr. ug PO1 Clint Almencion sa car 237 sa mobile patrol group diha na sa usa ka gasoline station sa barangay Tejero sa North Reclamation Area.
Narekober gikan sa grupo ang wallet ni Morales apan ang kwarta P1,602 nalang ug usa ka dolyar. Samtang ang cellphone sa biktima narekober ngadto sa usa ka Mario Econg nga taga Sitio Sto. Niño, Duljo-Fatima kinsa giingong maoy nakapalit sa maong cellphone.
Dugang sa nakuha gikan sa mga suspek mao ang usa ka kalibre 38 rebolber nga may sulod nga unom ka buhing bala nga giingong maoy gipangtion ni Jimwel Abellana kang Morales sa pagkahitabo.