'Manifesto' pabor kang Mangaoang gisaway sa kanhi Cebu Customs Collector

Gisaway karon sa kanhi kolektor sa Cebu Customs kinsa maoy Vice president for external affairs sa Chamber of Customs Brokers, Inc.(CCBI) Cebu chapter ang manifesto sa usa ka "paid-advertisement" sa duha ka dagkong pamantalaan sa dakbayan sa Sugbu nga nagsuporta kasamtangang kolektor sa adwana nga si Atty. Maria Lourdes Mangaoang.

Si David "Boy" Odilao sa pakighinabi sa media mitug-an nga duna siya'y mga dokumentong mapakita nga wa maabot sa adwana sa Sugbu sulod sa pito ka buwan sa milabay'ng tuig ug ning unang duha ka bulan sa 2006 ang ilang target.

Ang maong "paid-advertisement" mipadayag og dakong pagsuporta sa ug pagsalig sa mga grupo sa mga importer ug ubang mga negosyante sa kapabilidad ni Mangaoang isip kolektor sa adwana sa Sugbu nga nigawas atol sa adlaw nga pagbisita ni Presidente Gloria Arroyo ug ubang mga miyembro sa Kabinete niini.

Sa samang adlaw mao usab ang pagbutyag ni Budget Secretary Margarito Teves ngadto sa media nga dunay "re-evaluation" sa performance sa tanang mga district collector sa tibuok nasud.

Matud pa ni Odilao nga sugod niadtong Agosto 2005 hangtud ning bulan sa Pebrero 2006 mas ubos ang koleksyon base sa gi-target sa adwana sa Sugbu nga makolektang buhis sa pantalan sa maong mga bulan.

Dihang gipangutana kun duna bay kalambigitan niini ang smuggling sa pantalan wala na mokomentaryo ang kanhi kolektor apan mibutyag kini nga daghan nang mga importers nga kaniadto dinhi sa Sugbu mag-operate ang namalhin na sa General Santos, Davao ug Cagayan.

"I am in no position to comment on that but there are importers who already shifted their operations to Mindanao especially the last fourth quarter of 2005," matud pang Odilao kinsa midugang hinuon nga duna siya'y mga nahibaw-ang mga kwestyonableng transaksyon nga gikalambigitan sa Cebu Customs apan midumili na kini pagklaro sa maong impormasyon.

Giklaro usab ni Odilao nga wala siya manawagan sa pagpakanaog ni Mangaoang apan miingon hinuon nga agi'g delicadeza angayang mobiya nalang kini sa pwesto.

"If I were on her shoes, I would do so out of delicadeza," asoy pang Odilao human ipakita ang maong dokumento nga giingong maoy tinuuray nga agi sa koleksyon sa adwana sa Sugbu sa gihisgutang mga bulan.

Matud pa ni Odilao nga ang pagbiya sa mga importer duna gyuy dakong rason ug iyang giawhag ang mga dagkong opisyal sa kagamhanan sa pagsusi niini base usab sa resulta sa koleksyon sa maong mga buwan.

Si David "Boy" Odilao, 37 na ka tuig nga nagtrabaho kaniadto sa BOC ug nahimong kolektor dinhi sa Sugbu sukad niadtong 1993 hangtud 1998.

Samtang si Cebu District Customs Collector, Lourdes Mangaoang sa pakighinabi sa Banat News nagkanayon nga si Odilao agi'g delicadeza maoy angayang mohilom sa pagpanghilabot sa iyang buhatan.

"Out of delicadeza, he should stop meddling with customs affairs, retired na siya dili na siya angayang manghilabot," asoy pang Mangaoang.

Giduphan ni Mangaoang ang gikwestiyon nga koleksyon sa adwana sa pag-ingon nga maong negatibo ang agi karon sa adwana gumikan kini sa pagpataas sa gi-target nga kolektahunon nga nadungan usab sa pagtumaw sa problema sa politika sa nasud.

Apan bisan paman niini nangangkon si Mangaoang nga misaka og 14 porsiyento bisan dunay pag-us-os og 26 porsiyento sa volume sa importasyon dinhi sa Sugbu niadtong 2005. Iyang gihulagway nga "all time high" sukad sa kasaysayan sa adwana sa Sugbu ang maong pagtubo.

"The reason we did not meet our target to because we increased it 33 percent compared in the year 2004, while the national office (BOC) only increased their target to 25 percent," matud pang Mangaoang.

Giangkon hinuon ni Mangaoang nga 18 sa top 20 importers sa Sugbu mihunong na sa ilang pag-import gumikan sa sitwasyon karon sa nasud apan iyang gipanghimakak nga namalhin na kini ngadto sa Mindanao.