Aplikasyon para subasta sa stalls karon nalang kutob

Kutob na lang karong adlawa ang tagal sa paglukat og mga aplikasyon ug bayad alang sa aplikasyon sa subasta sa 159 ka mga bakanteng stalls sa mga merkado dinhi sa dakbayan sa Sugbu.

Si Cebu City market Administrator Elpidio dela Victoria Jr. sa pakighinabi sa Banat News mitug-an nga gikan sa alas 8 sa buntag kutob alas 5 ra sa hapon karong adlawa ang tagal sa pagproseso aron makaapil sa pre-bidding karong Marso 21.

Gipahibalo ni dela Victoria nga sa Unit One ug Three lakip na sa Freedom Park sa Carbon Market dunay 25 ka mga bakanteng stalls; 53 usab ang sa bag-ong merkado sa F. Ramos ; siyam sa Pardo public market ; 29 sa Taboan market ug 43 usab sa T. Padilla market.

Ang pre-bidding anha pagahimuon sa City Health lakip na sa mismong bidding sa maong mga puwesto karong Marso 28 sa samang buhatan.

Ang mga interesadong aplikante gikinahanglang makabayad karong adlawa kutob sa alas 5 sa hapon sa P200 nga application fee; P20 sa City treasurers office certification ug P20 usab sa market operations divisions certification.

Dugang sa mga kumpletuhon unya sa mga aplikante mao ang voter certificate gikan sa Comelec ug barangay captain's good moral certification sa aplikante.

Matud pa ni dela Victoria kun dili na madawat sa iyang buhatan karong hapon ang aplikasyon apan nakabayad na karong adlawa mahimo gihapong tiwason ang transaksyon ugmang adlawa basta napetsahan ang pagbayad og Marso 15.