Daghan ang sunog sa 2005 - Codilla

Sa niaging napulo ka tuig, ang tuig 2005 ang dunay daghang sunog nga nahitabo sa dakbayan sa Sugbo.

Kini ang gibutyag ni Cebu City Fire Marshall Supt. Esmael Codilla atol sa sinemanang forum sa Association of Government Information Officers-7 sa conference room sa Bureau of Fire Protection-7 kagahapon.

Gikan sa tuig 1996 hangtud 2005, ang BFP nakatala og 397 ka alarma sa sunog sa tuig 1997 diin mao usab ang dunay labing daku nga danyos nga niabot og P147-milyones.

Ang tuig 2005 ang dunay labing minus nga alarma sa sunog nga niabot og 112 apan maoy ikaduhang dunay labing daku og danyos sulod sa napulo ka tuig nga niabot og P116-milyones.

Gipasabot ni Codilla nga ang nakapadaku sa danyos sa tuig 1997 mao ang sunog sa Gazini Plaza sa dalan Colon samtang ang nakapadaku usab sa danyos sa sunog sa tuig 2005 mao ang pagkasunog sa bodega sa Cebu International Port diin daghang luhong sakyanan ang nasunog.

Nag-unang hinungdan sa mga sunog may kalabutan sa elektrisidad sumala pa ni Codilla.

Apan sa kinatibuk-an, sumala pa ni Codilla nga nagkaminus gyud ang alarma sa sunog sukad sa tuig 1996.

Gikan sa buwan sa Enero hangtud Pebrero ning tuiga, ang BFP nakatala na og 93 ka alarma sa sunog sa tibouk Central Visayas diin 40 niini sa lalawigan sa Sugbo samtang 14 sa dakbayan sa Sugbo.

Usa sa gitumbok ni Codilla nga hinungdan sa pagminus na sa alarma sa sunog mao ang pagkamabinantayon na sa katawhan ug pagsagop ug mga paagi nga malikayan ang sunog.