Barko nalunod palutawon

Gimando karon sa labaw sa Philippine Coast Guard ang dinaliang pag-salvage kun pagpalutaw og balik sa naunlod nga barkong Premship 10 (dili MV Friendship 10 nga unang migawas) gumikan sa peligrong namugna niini sa mga lumalabay nga mga barko diha sa may bukana sa Mactan Channel.

Si Vice Admiral Arthur Gosingan, hepe sa PCG mitug-an sa mga sakop sa media nga ang maong barko nga dunay kargang 17 mil ka sakong bugas sa National Food Authority nakamugna na og kalangay sa mga barkong migamit sa sea lane sa maong channel.

Ang Premship 10 nga gipanag-iya sa Premier Shipping Lines padulong na unta sa Catbalogan, Samar dihang kalit nga napunggit og dasmag sa MV Mihara 2 nga may gibug-atong kaduhaon sa gibug-aton usab sa Premship 10 nga 193.

Nahitabo ang panagbangga niadtong Sabado sa gabii diha sa taliwala sa boya numero 3 ug boya numero 6 sa may Batolinao Point duol sa utlanang bahin sa Consolacion.

Walay natahong nasakitan sa mga tripulante sa duha ka barko sa maong hitabo.

Samtang si Coast Guard Station-Cebu chief, Commander Manolito Malig-on sa unang pakighinabi sa Banat News mibutyag nga duna nay markers nga gibutang sa dapit diin maunlod ang maong barko.

Si Malig-on usab maoy gikatahong mangulo sa special board of inquiry aron husayon ang insidente.

Si 2nd District Coast Guard chief, Commodore Alejandro Flora sa pakighinabi sa Banat News nagkanayon nga gipasidan-an na niya ang tag-iya sa maong barko sa pagpadali sa pag-ugkat niini.

Samtang kabahin sa polusyon sa petrolyo gikan sa tangke ug makina sa maong barko diha sa ilawom nga naghatag og peligro sa mga isda ug takot sa dagat matud pa ni Flora nga gipabutangan na kini og "oil spill boom" aron dili makatag sa dagat.

Gipaabot nalang ni Flora nga kasugdan na ang gihulagway niyang taas ug dugay kaayong proseso sa inquiry aron pagtino sa kung si kinsa maoy sad-an sa insidente, matud pa niya nga ang duha ka habig nakasumitir na og marine protest ngadto sa ilang buhatan.