Mga residenteng namakwit gikan sa baybayon mibalik

Mihinayhinay nag pamauli ang mga namakwit gikan sa kabaybayonan sa Talisay City gikan sa mga kalungsoran sa lalawigan, dihang way nahitabong tsunami, baha, ug landslide kagahapon.

Matud pa ni Engr. Antonio Cervantes, Presidente sa Senior Citizens Federation sa Talisay nga kasagaran sa mga namakwit nangaluya sa pagpas-an sa ilang mga putos uli sa ilang mga balay.

Miingon si Cervantes nga kasagaran sa mga namiya sa ilang mga panimalay mao ang mga nagpuyo sa daplin sa baybayon sa Tangke, Cansojong, Poblacion, Dumlog, Biasong ug Pook.

Nasayran gikan kang Cervantes nga nianang miaging semana human makatap ang mensahe sa text nga matud pa ig-on ang Talisay sa tsunami, landslide ug baha inigka-Lunes. Matag gabii halos wala nay kinatulgan ang mga tawo sa pagpangadye.

Apan nianang pagka Biyernes ug Sabado, nagkabuang ang kadaghanan kay dihang namakwit na unta sila ngadto sa Tabunok, daghan ang miingon nga lunopan ang maong lugar tungod kay moawas ang grabeng baha sa sapa sa Mananga.

Namiya sa ilang balay tungod kay ang baybayon sa Talisay gi-tsismis man nga dasmagan og tsunami busa miadto sa Campo 6, apan pag-abot didto giabog usab sila pahilayo sa dapit tungod kay giingong mangatumba ang mga kabungtoran didto sa Guinsaugon.

Maoy hinungdan nga ang uban didto mamakwit sa bukiran sa Cantipla, ang uban miadto sa Danao, Toledo, Asturias ug uban pa.

Apan matud pa ni Cervantes nga dihang pagkamatngon nila kagahapon sa buntag nga hayag kaayo ang langit ug wa gyud madaot ang panahon, naghinayhinay kini'g pamauli sa ilang mga pinuy-anan sa Talisay.

Hinoon, matud pa ni Cervantes nga maayo na lang usab nga gihimo sa mga molupyo ang hingpit nga pagpangandam aron nga kon may mahitabo man nga katalagman, luwas sila.