KFR gang nga nakapiyansa wa ikalipay ni Tomas

Wala malipay si Mayor Tomas Osmeña sa nahitabong pagpiyansa sa upat ka mga gituohang sakop sa kidnap for ransom syndicate nga nasikop didto sa Mactan International Airport niadtong miaging semana.

Kumbinsido si Osmeña nga usa ka organisado nga sindikato ang nagpaluyo sa operasyon sa maong grupo nga gituohan usab sa mayor nga dunay koneksiyon ngadto sa mga dagkong opisyal sama sa mga heneral sa PNP ug militar.

Gibasehan sa mayor ang mga gi-peke nga identification card, mission order, mga high powered nga kalibre sa armas ug mga sakyanan nga igo nang makapamatuod nga lig-on ang maong grupo ug insakto sa plano.

Nasayran nga dali dayong nakasibat pahilayo dinhi sa Sugbo ang upat ka mga dinakpan nga sila si Jessie Pepino, pag-umangkon nga si Ronald, Crisologo Puzon ug Richard Orayan human gitugotan sa korte nga makapyansa og P10 mil matag usa sa kasong usurpation of authority nga ilang gisang-at sa piskaliya.

Gumikan niini giinsister ni Osmeña nga gikinahanglan pa ang subsob nga pagpatuman sa mga pamaagi ilabi na ang pagsagop sa holiday atol sa pagpahigayon sa ASEAN Summit karong Disyembre aron gyud masiguro ang seguridad sa mga motambong nga pamuno nasud sa lainlaing kanasuran.

Giawhag karon sa mayor ang National Bureau of Investigation (NBI-7) nga mohimo og subsob nga pakisusi gikan sa pagkasikop sa mga suspek ug hangtod na sa pagtumbok sa ilang mga posibleng koneksiyon dinhi sa Sugbo.

Nagkanayon si Osmeña nga posibleng dunay dakong misyon ang maong grupo dinhi sa Sugbo hinungdan nga subli niyang girekomendar ang higpit nga seguridad aron makapakgang ang mga giplanong ilegal nga transaksiyon sa maong grupo sa mga sindikato.

Gipasalig ni Osmeña nga iyang ihatag ang gitanyag nga P50 mil nga ganti alang niadtong mga tawo nga makahatag og dugang impormasyon kabahin sa kalihukan o background sa maong grupo.