20-anyos nga tinun-an gi-pangrape sa iyang mga kauban sa team

Usa ka 20 anyos nga graduating sa kursong Fine Arts sa usa ka inilang unibersidad dinhi sa dakbayan nabiktima sa gang rape sa giingong iya rang mga kauban sa team sa duwang football samtang nagpahigayon sa ilang "kick-off" party diha sa Hudson Beach Resort sa Agus, Lapu-Lapu niadtong milabay'ng gabii.

Ang biktima giingong naabtan sa mga kaubanang mga babaye uban sa duha ka player nga ka teammates diha sa atubangang bahin sa kolor puting multicab samtang ang laing tulo ka mga suspek diha sa luyo nagpaabot.

Giingong hubo na ang katunga sa sapot sa biktima dihang naabtan sa mga kaubanang nangita kaniya gumikan sa kalit nga pagkawala niini diha sa pundok ug sa mga suspek.

Ang mga ngalan sa mga suspek gipugngan una sa Banat News sanglit kaubanan ra sa biktima sa iyang team ug tunghaan samtang ang usa kanila naka-eskapo.

Sumala pa ni SPO1 Editha Patalinghug sa Women's Desk sa kapolisan sa Lapu-Lapu sa pakighinabi sa Banat News ang biktima naabtang nagsige og singgit og pangayo'g tabang samtang gihimo sa duha ka mga suspek ang dautang tuyo sa biktima.

"Gipangita man ni siya sa iyang mga kaubanan kay nawala lagi og kalit," asoy pang Patalinghug.

Dihang nasakpan daling mitawag ang labaw-labaw sa grupo og polis hinungdan sa pagkasikop sa upat apan nakaeskapo ang usa kanila.

Ang biktima gidala na sa "pink room" sa Vicente Sotto Memorial Medical Center aron pagpalig-on sa alegasyon sa biktima.