Ang barkong MV Friendship X gikan pa sa Pier 4 sa dakbayan sa Sugbo padulong na unta sa dakbayan sa Catbalogan, Eastern Samar dihang gikadasmag ang barkong MV Mijara II nga gikan usab sa dakbayan sa Iligan. Maayong pagkalunod sa MV Friendship X.
Ang MV Mijara II giingong gipanag-iya sa East Venture Incorporated sa Cotabato City ug padulong na unta sa baraderohan sa barangay Tayud, lungsod sa Liloan dihang nahitabo ang aksidente pag-abot diha sa tunga-tungang bahin sa buoy number three ug buoy number six nga giingong nahimutang duol sa utlanan sa Mandaue ug Consolacion.
Niadtong tungora ang MV Friendship X nga gipanag-iya sa Premier Shipping dunay kargang 17,000 ka sakong bugas sa National Food Authority nga dad-on sa lalawigan sa Samar.
Matud pa nga nadasmagan sa may gibug-atong 400 ka toneladang MV Mijara II ang mismong superstructure kun tunga-tungang bahin sa MV Friendship X nga duna ray 193 ka toneladang gibug-aton, matud pa ni Coast Guard station- Cebu Commander Manolito Malig-on sa pakighinabi sa Banat News.
Giingong mi-cross ang Mijara II diha sa may bukanahan sa Mactan Channel gikan pa sa Mindanao nga atol usab sa pagguwa sa Friendship X hinungdan nga nasungag ang sentro sa maong barko.
Ang grabeng kadaut nga nahiaguman sa MV Friendship maoy nakaingon nga mideklarar ang kapitan niining si Olympio Jugalbot dangtan og kapin 20 ka minutos nga iabandona ang barko aron luwason ang kinabuhi sa iyang 21 ka mga tripulante.
Ang kapitan sa Mijara nga si Jovencio Granados mimando sa pagluwas sa mga tripulante sa MV Friendship nga niadtong tungura nanglayat na sa tubig ug mipadayon sa paglawig ngadto sa PKS shipyard diin kini ibaradero.
Gibutangan na og 'marker' sa Coastguard Cebu station ang nahitaboan aron likayan sa ubang mga barkong makaagi nga posibleng ilang kasangitan.
Samtang karong adlawa sugdan na ang proseso sa board of inquiry alang sa imbestigasyon diin ipatawag ang mga tripulante sa duha ka mga barko.