Bag-ong 3 nga gi-AIDS sa Cebu hamok

Giisip nga usa ka dakong hamok karon sa mga lalaki ug babaye kining tulo ka mga tawo nga bag-ong nataptan sa sakit nga Acquired Immunodeficiency Syndrome (AIDS) dinhi sa Cebu kansang mga ngalan ug pagkatawo wala ipaila ngadto sa publiko.

Matud pa ni Dr. Rene Josef Bullicer, presidente sa AIDS Free Philippines nga tungod kay gililong kini sa taga Department of Health dako kaayo og posibilidad nga makapanakod pa kining usa ka babaye ngadto sa daghang mga lalaki.

Ingon usab kining duha ka lalaki kinsa gitugotan rang makasikit ug makigsagol sa publiko kay wala man sila did-i sa gobyerno.

Matud pa ni Bullicer nga bisan husto kining gibuhat sa gobyerno nga dili ibutyag kun kinsa kining tulo aron nga makapadayon sila sa normal nilang kinabuhi, apan angay nga ang tanan magbantay niini.

Sa tulo usa ang babaye kansang sakit naangkon gumikan sa iyang pagka-commercial sex worker.

Samtang ang duha ka lalaki, nataptan og AIDS gumikan niining paggamit og injection sa ilegal nga drugas sa ilang lawas.

Sa pagkakaron nahimo nang 66 sa katibuk-an ang gidaghanon sa mga nataptan sa sakit nga AIDS dinhi sa Cebu.

Usa sa hinungdan nganong pasagdan silang manginabuhi nga normal, matud pa sa taga DOH, nga aron dili sila matintal sa paghikog sa ilang kaugalingon.