Taxi operators supak sa silot sa di paggamit metro

Mga tag-iya og taksi dinhi sa Sugbo dakong supak sa ordinansahon ni Konsehal Sylvan Jakosalem nga ipalakip sila pagpahamtang og silot kun ang ilang mga drayber dili mopasakay og pasahero ingon man dili mogamit sa calibrated nga taxi meter.

Si Richard Cabucos, presidente sa Metro Cebu Taxi Operators Association, nahimangod pag-ayo sa mga opisyal sa dakbayan nga wala mopatawag kanila atol sa public hearing niadtong Miyerkules sa hapon.

Matud ni Cabucos nga dili makiangayon nga silang mga operator apilon sa pagsilot tungod kay kabubut-on ra sa mga drayber ang ilang pagabuhaton kon dili sila mogamit og metro sa pagsukod sa bayranan sa ilang pasahero ingon man kun dili mopasakay.

Bugtong si Simeon Velez ang presidente sa Southern Cebu Operators and Drivers Association Incorporated (Scodai) ang mitambong sa public hearing ug mipadayag nga dili siya supak sa maong ordinansahon ni Jakosalem.

Gitataw hinuon ni Velez nga uyon hinuon siya nga silotan ang mga drayber nga makahimo og salaod.

Nagtuo si Cabucos nga gituyo sa mga konsehal nga dili sila patambungon aron nga mapadali ra ang pagka-aprobar sa buot nila mapatuman nga ordinansa.

Ang grupo ni Cabucos mitakda nga mopadangat og position paper ngadto sa City Hall aron nga supakon ang tinguha sa ordinansa nga apilon silang mga operator sa pagsilot sa sala sa ilang draybers.

Nasayran nga subay sa maong ordinansahon ni Jakosalem P500 ang bayranang multa niadtong mga drayber og taksi nga makalapas sa maong balaod, P1000 sa ikaduhang higayon og P1,500 sa ikatulong paglapas.