Tiyo sa 1 sa 4 ka dinakpan nangayo'g reward

Nagpa-uban sa mga silingan ug ni Tejero Barangay Captain Lito Fajardo ang uyoan sa usa sa upat ka mga nasikop nga suspek sa gituohang kidnap for ransom group sa pagpakigkita ngadto ni Konsehal Augustus Pe Jr. diha sa Cebu City Hall kagahapon sa buntag.

Si Esmael Peña, uyoan ni Crisologo Puson, midangop sa Cebu City Hall sa tumong nga kalimpyohan ang iyang pangalan human gilambigit ang iyang pag-umangkon sa gituohang kidnap for ransom syndicate dinhi sa Sugbo.

Gitug-an ni Peña nga diha gibilin sa ilang pinuy-anan ang mga gamit ni Puson sama sa armas nga kalibre .45 ug uban pang mga gamit niini.

Si Puson ug mga kauban niini nga si Jessie Pepino, pag-umangkon nga si Ronald ug Richard Orayan nasikop didto sa Mactan Cebu International Airport (MCIA) niadtong Domingo nga armado ug gituohang nagpa-abot sa dagiton niining biktima.

Gibutyag ni Pe nga mitug-an kaniya ang uyoan ni Puson nga dunay misyon ang maong grupo sa iyang pag-umangkon dinhi sa Sugbo apan wala niya iklaro og detalye kun unsang klase ang ilang misyon nga himuon gumikan kay igo lang kining mihatag og katin-awan nga walay labot siya sa maong mga ilegal nga kalihukan.

Giangkon hinuon ni Peña nga mag-anha-an sa Tejero sa ilang pinuy-anan si Puson aron magpalabada gumikan kay atua man kini mag-abot sa syudad sa Lapu-Lapu ug lumad nang atua magpuyo sa Cavite.

Hinuon, gitugyan sa konsehal ngadto sa hepe sa Criminal Intelligence and Investigation Bureau (CIIB) Supt. Paul Labra ang dugang pagsukitsukit kang Peña sa pamasin nga makahipos kini og dugang pang mga kasayuran kabahin sa mga nadakpan nga suspek ug aron pagtino kun kuwalipikado ba kining modawat sa ganti nga gihatag sa siyudad.

Nasayran nga mitanyag si Mayor Tomas Osmeña og P50 mil nga ganti niadtong mga tawo nga makahatag og dugang inpormasyon may labot sa background sa upat ka mga nadakpang suspek ingon man sa mga local contact niini.

Duda ang mayor nga may koneksiyon ang maong grupo sa mga teroristang pundok nga gikabalak-an nilang magmugna og kagubot atol sa ipahigayong 12th Asean Summit dinhi sa Sugbo karong Disyembre.