Taxi driver di mogamit og metro silotan, ok sa transpo

Suportado sa pundok sa transportasyon sa Sugbo ang balaodnon nga nagtinguha sa pagpahamtang og silot niadtong mga taxi drivers nga dili mogamit og mga calibrated nga metro sa ilang pagpamasahero dinhi sa dakbayan sa Sugbo.

Apil sa maong balaodnon nga gipangamahanan ni Konsehal Sylvan Jakosalem ang pagpahamtang og silot pinaagi sa pagpabayad og multa niadtong mga drayber sa taksi nga mobalidad og pasahero bisan og bakante ang maong unit nga ilang gimaneho.

Atol sa sesyon sa konseho sa dakbayan kagahapong adlawa gipahigayon usab ang public hearing sa maong ordinansahon diin gipadayag sa kahugpungan sa transportasyon sa Sugbo ang ilang pagpabor niining maong balaod.

Tumong niini aron madisiplina ang mga drayber ug dili mo-abuso sa mga pasahero sama sa dili pagamit og calibrated nga metro ingon man niadtong mga drayber nga mamili og pasahero.

Kini pinaagi sa suwat nga giduso ngadto sa konseho ni Mr. Felix Taguiam, chairman sa transportation Committee, sa Cebu Chamber of Commerce and Industry pinetsahan niadtong Marso 1.

Nasayran nga daghan na ang mga reklamo sa mga pasahero batok niadtong mga drayber og taksi nga kusog mangigo og pasahero ug mogamit sa pakyaw pakyaw nga sistema sa pagpabayad og pleti.

Gawas niini, daghan usab ang reklamo batok niadtong mga drayber og taksi nga mamili og mga pasahero nga ihatod bisan og bakante ang gimaneho niining sakyanan.