5 ka batan-on gisikop sa aktong nag-hazing

Lima ka batan-on ug tulo kanila mga tinun-an sa usa ka pribadong tunghaan sa, Compostela gisikop sa kapolisan human nasakpan sa akto nga nagpahigayun og fraternity hazing.

Ang nangasikop mao ang tulo ka 14 anyos nga mga tinun-an, usa ka 16 anyos nga out-of-school youth ug usa ka Reivie Logoy, 21 anyos, ulitawo nga taga sitio Upper Guiwanon lungsod sa Compostela.

Alas 2 pasado sa hapon sa niaging adlaw, ang grupo ni SPO4 Socrates Medello ug mga sakop sa Citizens Against Crime Organization sa lungsod sa Compostela misusi sa taho nga may fraternity hazing sa bakanteng lote sa sityo Guiwanon, barangay Poblacion sa maong lungsod.

Paghiabot sa kapolisan sa lugar, nadunggan pa ang inagulo sa mga batan-on nga gibunalan sa paddle.

Duha ang nakasibat atol sa operasyon ug usa kanila nga nagdala sa paddle ang nailhan lang sa pangalan nga Jake ug gitumbok sa mga nangasikop nga batan-on nga ilang lider.

Base sa mga dokumento nga nahipos sa kapolisan gikan sa maong lugar, ang grupo nagdala sa pangalan nga "Upsilon Phi Omega" gun metal chapter.

Giisip sa kapolisan ang mga batan-on nga biktima lang sa kasong pagpangabuso sa kabataan nga binuhatan ni Jake maong gitugyan kini pagbalik ngadto sa mga ginikanan sanglit mga minor de edad pa usab.

Miasoy ang mga batan-on ngadto sa kapolisan nga wala sila kaila sa nagbunal kanila sanglit gitaptapan ang ilang mga mata.

Gisusi na sa kapolisan sa lungsod sa Compostela ang tinuod nga pagkatawo ni Jake aron pasakaan kini og kasong child abuse. - Uba sa report ni Rey Pasaporte