Cha-cha moayo sa ekonomiya

Makapadali sa paglambo sa ekonomiya sa nasud ang Charter Change kon pag-usab sa Batakang Balaud.

Kini sumala pa ni kanhi Gob. Pablo Garcia kinsa sakop sa Constitutional Commission atol sa usa ka briefing sa Cha-Cha sa mga tinun-an ug mga magtutudlo sa University of San Jose-Recoletos sa Basak, dakbayan sa Sugbo.

Gipasabot ni Garcia nga ang economic provisions sa 1987 Constitution wala magtugot sa mga langyaw nga makapanag-iya sa natural resources sa nasud.

Kini ang usa sa angayang usbon sanglit dili mapahimuslan ang maong mga natural resources kon pasagdan ang mga Pilipino nga walay kaya nga mopalambo niini.

"The Philippines is rich in natural resources but what are these natural resources for if these remain undeveloped?" nagkanayun si Garcia.

Usa sa gitumbok ni Garcia nga nakababag sa kahinay sa paglambo sa ekonomiya mao ang kakuwang og puhunan sa mga lokal nga magpapatigayun nga mogamit sa mga natural resources.

Matud pa ni Garcia nga sama sa ubang kanasuran nga kusog ang paglambo, giablihan niini ang ilang pamatigayun ngadto sa mga langyaw.

Ang administrasyon ni Presidenti Gloria Macapagal Arroyo kusganong nagdapit sa mga langyaw'ng magpapatigayun nga mobubo sa ilang puhunan sa nasud aron makahatag usab og daghang trabaho sa katawhan.

Dugang pa sa kanhi gobernador nga nisuporta sa Cha-Cha sanglit daghang probisyon niini sa ekonomiya ang angayan nang usbon nga maoy makapadali sa paglambo sa ekonomiya sa nasud.