Nagkanta sa videoke gisukmag dayong gipusil

Tungod sa kaanindot sa iyang tingog samtang nagkanta sa videoke, usa ka lalaki ang gisukmag usa pa pusila sa usa sa tulo ka mga lalaki nga nag-inom og ilimnong makahubog didto sa Inuburan, Naga sa miaging gabii.

Ang anaa sa talandugon nga kahimtang sulod sa tambalanan mao si Jerlon Deguma 24, minyo nagpuyo sa maong barangay, kinsa nakaangkon og duha ka samad pinusilan sa iyang dughan ug tiyan agi sa wala pa matino nga kalibre sa armas nga maoy gigamit sa pagpusil ngadto sa biktima.

Samtang ang tulo ka mga suspek nailhan lang sa ngalan nga Nilo ug Jeffrey Canoy hingkod ang panuigon, ug ang igsuon nga Marvin Canoy, 18, pulos taga Inuburan.

Si SPO1 Bienvinedo delos Santos sa Naga, Police Station nga nahinabi sa Banat News nagkanayon nga ang biktima nagkanta sa videoke ug diha ang mga suspek nga nag-inom, wa magdugay nasuya ang usa sa tulo ka mga suspek ug gisukmag ni Marvin ang biktima.

Midugang si delos Santos nga mitumaw ang karambola, hinungdan nga mibunot og armas si Jeffrey dayon pusil katulo ka higayon, apan duha ra ang miigo ngadto sa biktima.

Ang tulo ka mga suspek daling misibat palayo sa maong dapit ug padayon pang gipangita sa kapolisan sa Naga.

Si Deguma daling gidala sa Vicente Sotto Memorial Medical Center ug padayon pang giatiman sa mga doktor.