Pinoy lisud nang makatrabaho kay minus sa English

Nalantawan ni Kongresista Eduardo Gullas ang pagsawom pag-ayo sa mga Pilipino sa natad sa pangempliyo kon pasagdan kining mabangkarota sa sinultihang Eningles.

Usa sa natad nga lupig kaayo ang mga Pilipino karon sa mga Indian ug Insek didto sa gawas mao ang babysitter ug mga domestic helpers.

Gumikan sa kakuwang sa Eninglis sa mga Pilipino, mopabor ang mga trabahoan kon amo didto sa gawas sa mga tigbantay sa bata ug mga katabang sa panimalay nga taga India ug China kay larino kaayo sila manabi og Eninglis.

Bisan sa mga engineer ug uban pang dagkong posisyon, mas dyutay nalay morekuridag mga Pilipino kay kadaghanan niini magyangoyango lang sa isulti sa amo kay dili kaantigo mo-eninglis.

Si Gullas kinsa usa sa mga tag-iya og dakong eskuylahan dinhi sa nasud nagkanayon nga isip magbabalaod, gusto niyang ibalaod gayud nga higpit sa mga eskuylahan nga bairon gyud ang tanang mga estudyante sa sinultihang Eninglis.

Gusto niyang himoong sumbanan karon sa tanan ang gihimo sa lokal nga kagamhanan sa Muntinlupa City nga dili lamang sa eskuylahan kon dili bisan pa sa mga trabahoan ug hangtod ngadto sa kamerkaduhan ug umahan, pa-Eninglison na gyud ang tanan.

Iyang gisubay nga sa mga 400,000 matag tuig nga mograduwar og kurso sa atong nasud, dili makaabot og 12,000 ang mga makakitag trabahong maayo dinhi sa nasud gumikan kay dili kamao mo-Eninglis.

Samtang sa inaplayay og trabaho sa gawas, lupigon pag-ayo ang mga Pilipino kay ang mga kagamhanan sa India ug China, nakaamgo na.

Dihang nasayod silang nagtakilid ang ilang katawhan sa natad sa panarbaho sa gawas gumikan sa kadaghang populasyon nila, ila kining gipabansay pagsulat og Eninglis, hinungdan nga misaler kini ug puwerti nang larinoha nila muyawyaw og Eninglis karon ug dali ra kaayong makakita og trabaho. - Wen Celen Lalaki nakuhaag 107 stick marijuana Ni Romeo T. Limpangog

Nasakpan nga nagdala og 107 ka stick nga pinaugang dahon sa marijuana nadakpan sa kapolisan sa lungsod sa Tuburan sa gihimo nilang kinalit nga checkpoint.

Ang checkpoint nga gipahiluna sa kapolisan sa dalan sa may Proper Tuburan human usab nila madawat ang taho sa usa ka concerned citizen sa maong lugar.

Ang nadakpan ug nagtingkagol na sa prisohan mao si Eugine Molina, hingkod ang panuigon, ulitawo nga nagpuyo usab sa nahisgotang lugar.

Si SPO3 Lino delos Santos sa nahisgotang lungsod miingon nga ang taho ilang nadawat mahitungod sa ilegal nga kalihukan sa maong suspetsado sa maong dapit.

Dihang gipahiluna ang checkpoint ug ang suspetsado nga miagi sa maong dapit gihimoan sa pagrikisa ug nakuha gayod ang maong gidaghanon sa shabu.

Matud pa ni SPO3 delos Santos nga maong mga ebidensiya ang ilang giduso sa PNP Crime Laboratory alang sa tukmang pakisusi ug ang resulta maoy basehan sa pagsang-at sa kaso.